New Electric Car Launched : भारतात इलेक्ट्रिक वाहनांची (EV) मागणी झपाट्याने वाढत असून, याचा थेट परिणाम ऑटोमोबाईल उद्योगावर दिसून येत आहे. पेट्रोल-डिझेलच्या वाढत्या किमती, पर्यावरणाबाबत वाढलेली जागरूकता आणि सरकारकडून मिळणारे प्रोत्साहन यामुळे ग्राहकांचा कल इलेक्ट्रिक कारकडे वळला आहे. याच पार्श्वभूमीवर 2026 मध्ये भारतात एकूण चार नव्या दमदार इलेक्ट्रिक कार लाँच होणार असून, यात टाटा मोटर्ससह मारुती सुझुकी आणि टोयोटा यांसारख्या मोठ्या कंपन्यांचा समावेश आहे.
Maruti Suzuki e Vitara
मारुती सुझुकीची ही भारतातील पहिली इलेक्ट्रिक SUV असणार आहे. 2026 च्या पहिल्या तिमाहीत लाँच होण्याची शक्यता असलेल्या या कारमध्ये 49 kWh आणि 61 kWh अशा दोन बॅटरी ऑप्शन्स दिले जाणार आहेत.
मोठ्या बॅटरीसह ही SUV एकदा चार्ज केल्यावर सुमारे 543 किलोमीटरपर्यंत रेंज देऊ शकते. सुमारे 172 bhp पॉवर, आधुनिक फिचर्स आणि डेल्टा, जेटा व अल्फा हे तीन ट्रिम्स या कारचे वैशिष्ट्य असणार आहे. दीर्घकाळापासून ग्राहक या कारची उत्सुकतेने वाट पाहत आहेत.
Toyota Urban Cruiser Ebella
टोयोटाची पहिली इलेक्ट्रिक कार असलेली Urban Cruiser Ebella ही Maruti e Vitara वर आधारित आहे. मात्र, तिचे डिझाइन अधिक शार्प आणि प्रीमियम असणार आहे. या कारमध्ये 48.8 kWh आणि 61.1 kWh क्षमतेची बॅटरी मिळेल, जी कमाल 543 किमीपर्यंत रेंज देऊ शकते. या मॉडेलमुळे टोयोटा अधिकृतपणे भारताच्या EV सेगमेंटमध्ये प्रवेश करणार आहे.
Tata Sierra EV आणि Tiago EV Facelift
टाटा मोटर्स आपली आयकॉनिक Sierra कार इलेक्ट्रिक अवतारात पुन्हा सादर करणार आहे. Tata Sierra EV मध्ये AWD (ऑल-व्हील ड्राइव्ह) पर्याय मिळण्याची शक्यता असून, 55 ते 65 kWh बॅटरीसह सुमारे 500 किमी रेंज अपेक्षित आहे.
याचबरोबर 2026 मध्ये Tata Tiago EV चा फेसलिफ्ट व्हर्जनही लाँच होणार असून, यात नवा लुक आणि डिजिटल डॅशबोर्ड मिळेल. मात्र, बॅटरी आणि रेंजमध्ये फारसा बदल नसेल.
Tata Avinya Sportback
Tata Avinya Sportback ही टाटाची सर्वात प्रीमियम आणि हाय-टेक इलेक्ट्रिक कार असणार आहे. 2026 च्या अखेरीस लाँच होण्याची शक्यता असलेल्या या कारची रेंज 600 किलोमीटरपेक्षा जास्त असू शकते. भविष्यातील डिझाइन, अत्याधुनिक टेक्नॉलॉजी आणि लांब रेंज यामुळे ही कार EV बाजारात नवा मापदंड सेट करू शकते.
एकूणच, 2026 हे वर्ष भारतीय इलेक्ट्रिक कार बाजारासाठी निर्णायक ठरण्याची शक्यता असून, ग्राहकांना अधिक पर्याय, चांगली रेंज आणि प्रगत फिचर्स असलेल्या कार्स मिळणार आहेत.
