Skoda Enyaq iV:- भारतीय बाजारपेठेत इलेक्ट्रिक वाहनांची वाढती लोकप्रियता पाहता स्कोडा या प्रसिद्ध वाहन उत्पादक कंपनीने अखेर त्यांच्या पहिल्या इलेक्ट्रिक कारचे अनावरण करण्याचा निर्णय घेतला आहे. अशी शक्यता आहे की, ही कार Enyaq iV असेल. जी आधीच आंतरराष्ट्रीय बाजारात उपलब्ध आहे. अनेक अहवालांनुसार हे मॉडेल 2024 मध्येच भारतात दाखल होणार होते.मात्र काही कारणांमुळे त्याच्या लाँचिंगला विलंब झाला.
स्कोडा Enyaq iV कधी लाँच होईल?
स्कोडाच्या इलेक्ट्रिक वाहनाच्या लाँचिंगबाबत कंपनीचे ब्रँड डायरेक्टर पेट्र जानेबा यांनी अधिकृत माहिती दिली आहे. ते म्हणाले की, स्कोडाची पहिली ईव्ही कार सप्टेंबर 2025 मध्ये भारतीय बाजारात दाखल होईल.
मात्र त्यांनी कोणत्या मॉडेलला प्राधान्य दिले जाईल हे उघड केले नाही. यासंदर्भात ऑटोकार इंडिया च्या एका अहवालात असे नमूद करण्यात आले आहे की स्कोडाकडे MEB (Modular Electric Drive Matrix) प्लॅटफॉर्मवर आधारित तीन मॉडेल्स आहेत – Elroq, Enyaq आणि Enyaq Coupe.
सरकारच्या आगामी ईव्ही धोरणाच्या पार्श्वभूमीवर मार्च 2025 पर्यंत स्कोडा अंतिम निर्णय घेईल की भारतीय बाजारात कोणती इलेक्ट्रिक कार सर्वप्रथम सादर करावी. कंपनीने यापूर्वीच भारतीय बाजारासाठी ईव्ही चाचणी सुरू केली होती आणि India Mobility Show 2024 मध्ये याची झलक देखील दिसली होती.
स्कोडा Enyaq iV ची बॅटरी, पॉवर आणि रेंज
स्कोडा Enyaq iV चे भारतीय आवृत्तीमध्ये टॉप-एंड मॉडेल Enyaq iV 80x सादर केली जाऊ शकते. या कारमध्ये 77 kWh क्षमतेची मोठी बॅटरी दिली जाणार आहे. ही बॅटरी ड्युअल मोटर सेटअप सह येईल, म्हणजेच प्रत्येक ऍक्सलवर एक मोटर बसवली जाईल.
ही इलेक्ट्रिक एसयूव्ही जास्तीत जास्त 261 BHP ची पॉवर निर्माण करू शकते. तसेच, यामध्ये 125 kW DC फास्ट चार्जिंग सपोर्ट मिळेल.ज्यामुळे कार वेगाने चार्ज करता येईल.
एकदा पूर्ण चार्ज केल्यानंतर 513 किलोमीटर (WLTP) पर्यंतची रेंज देण्याची शक्यता आहे.त्यामुळे ही कार लॉन्ग ड्राइव्हसाठी उत्तम पर्याय ठरू शकते.
भारतीय बाजारातील स्पर्धा
भारतात इलेक्ट्रिक वाहन क्षेत्रात टाटा, महिंद्रा, एमजी आणि ह्युंदाईसारख्या कंपन्यांनी आधीच आपली पकड मजबूत केली आहे. टाटा मोटर्सच्या Nexon EV आणि ह्युंदाईच्या Kona EV प्रमाणेच, स्कोडाची ही SUV भारतीय ग्राहकांसाठी एक उत्तम पर्याय ठरू शकते.
सध्या भारतीय बाजारात प्रीमियम इलेक्ट्रिक SUV सेगमेंटमध्ये मोठ्या प्रमाणावर स्पर्धा वाढली आहे. BYD Atto 3, Hyundai Ioniq 5, Kia EV6 आणि Volvo XC40 Recharge या वाहनांना स्कोडा Enyaq iV कडून मोठी स्पर्धा मिळण्याची शक्यता आहे.
स्कोडा Enyaq iV किंमत किती असेल?
स्कोडाने अद्याप त्यांच्या पहिल्या इलेक्ट्रिक SUV च्या किंमतीसंदर्भात कोणतीही अधिकृत घोषणा केलेली नाही. मात्र, ही कार 50 लाख रुपयांच्या आसपासच्या किंमतीत (एक्स-शोरूम) लाँच होऊ शकते, अशी अपेक्षा आहे.
स्कोडाची पहिली इलेक्ट्रिक कार भारतीय बाजारासाठी महत्त्वाची ठरणार आहे. कंपनीकडून Enyaq iV 80x मॉडेल लाँच होण्याची शक्यता जास्त असून त्यामध्ये 77 kWh बॅटरी, 261BHP पॉवर आणि 513 किमीची रेंज मिळणार आहे. भारतीय ग्राहकांसाठी ही एक प्रीमियम पर्याय ठरू शकते. आता फक्त सप्टेंबर 2025 मध्ये अधिकृत लाँचची वाट पाहावी लागेल.
