Tata Tiago : जर तुम्ही सध्या CNG कार खरेदी करण्याचा विचार करत असाल, तर तुमच्यासाठी ही बातमी खूपच उपयुक्त ठरू शकते. वाढत्या पेट्रोल-डिझेलच्या किमती पाहता ग्राहकांचा कल CNG वाहनांकडे झपाट्याने वाढत आहे. अशा परिस्थितीत टाटा मोटर्सने आपल्या मजबूत आणि सुरक्षित वाहनांमुळे ग्राहकांचा विश्वास कायम ठेवला आहे.
आज आम्ही तुम्हाला टाटा कंपनीच्या सर्वात स्वस्त CNG कारबाबत सविस्तर माहिती देणार आहोत. टाटा मोटर्सची सर्वात स्वस्त CNG कार म्हणजे टाटा टियागो. ही कंपनीची एक लोकप्रिय हॅचबॅक कार असून हॅचबॅक सेगमेंटमध्ये तिला मोठी मागणी आहे.
टियागोची पेट्रोल व्हेरिएंटची किंमत 4.57 लाख रुपयांपासून (एक्स-शोरूम) सुरू होते. मात्र, जर तुम्हाला CNG व्हेरिएंट घ्यायचा असेल, तर त्यासाठी थोडा जास्त खर्च करावा लागेल.
टाटा टियागो CNG ची किंमत पाहता, या कारचा बेस CNG व्हेरिएंट 5,48,990 रुपये (एक्स-शोरूम) पासून उपलब्ध आहे. ही टाटा मोटर्सची सध्या भारतातील सर्वात स्वस्त CNG कार मानली जाते. याशिवाय आरटीओ नोंदणी, इन्शुरन्स आणि इतर शुल्क वेगळे असतात.
जर ग्राहकाने टियागोचा टॉप CNG व्हेरिएंट निवडला, तर त्यासाठी सुमारे 8,09,690 रुपये (एक्स-शोरूम) मोजावे लागतात. या किमतीत टियागोची थेट स्पर्धा ह्युंदाई ग्रँड आय10 निओस CNG आणि मारुती सेलेरियो CNG या गाड्यांशी होते.
मायलेजच्या बाबतीत टाटा टियागो CNG ग्राहकांना चांगला फायदा देते. कारदेखोच्या माहितीनुसार, टियागोचा CNG मॅन्युअल व्हेरिएंट 26.49 किमी प्रति किलो मायलेज देतो, तर CNG ऑटोमॅटिक व्हेरिएंट 28.06 किमी प्रति किलोपर्यंत मायलेज देऊ शकतो. त्यामुळे दैनंदिन वापरासाठी ही कार किफायतशीर ठरते.
सेफ्टीच्या बाबतीतही टाटा टियागो आघाडीवर आहे. ग्लोबल NCAP क्रॅश टेस्टमध्ये या कारला प्रौढ प्रवाशांसाठी 4 स्टार आणि बाल प्रवाशांसाठी 3 स्टार सेफ्टी रेटिंग मिळाले आहे, जे या सेगमेंटमध्ये मोठी बाब मानली जाते.
फीचर्सबद्दल बोलायचे झाले, तर टाटा टियागोमध्ये ड्युअल फ्रंट एअरबॅग्स, इलेक्ट्रॉनिक स्टॅबिलिटी प्रोग्राम, आयसोफिक्स चाइल्ड सीट माउंट, रिव्हर्स पार्किंग कॅमेरा,
मोठी टचस्क्रीन इन्फोटेनमेंट सिस्टम, वायरलेस अँड्रॉइड ऑटो व अॅपल कारप्ले, ऑटोमॅटिक क्लायमेट कंट्रोल, क्रूझ कंट्रोल, हिल होल्ड कंट्रोल आणि 242 लिटर बूट स्पेससारखी अनेक प्रीमियम फीचर्स देण्यात आली आहेत.
एकूणच, कमी बजेटमध्ये सुरक्षित, किफायतशीर आणि फीचर्सने परिपूर्ण CNG कार हवी असल्यास टाटा टियागो हा एक उत्तम पर्याय ठरू शकतो.
