८ फेब्रुवारी २०२५ व्हिएतनामी इलेक्ट्रिक वाहन उत्पादक कंपनी VinFast ने नुकत्याच पार पडलेल्या इंडिया मोबिलिटी ग्लोबल एक्स्पो 2025 मध्ये आपल्या विविध इलेक्ट्रिक कार्सचे प्रदर्शन केले आहे.विशेषतः, VinFast VF 6 आणि VinFast VF 7 ही मॉडेल्स यावर्षीच्या सणासुदीच्या काळात भारतात लाँच केली जाण्याची शक्यता आहे.कंपनीच्या या आगामी इलेक्ट्रिक कार्सबाबत भारतीय ग्राहकांमध्ये मोठी उत्सुकता आहे.
याशिवाय, VinFast ने 2026 पर्यंत भारतात त्यांची सर्वात परवडणारी इलेक्ट्रिक कार VinFast VF 3 सादर करण्याची योजना जाहीर केली आहे.ही कार कॉम्पॅक्ट डिझाइनसह येणार असून ती टाटा नॅनोच्या आकाराच्या जवळपास असेल.मात्र, तिची अंतर्गत रचना आणि जागेचा वापर अधिक चांगल्या प्रकारे करण्यात आला आहे,ज्यामुळे चार प्रवासी आरामात बसू शकतात.त्यामुळे, छोटी कार शोधणाऱ्या भारतीय ग्राहकांसाठी ही एक आकर्षक आणि उपयोगी निवड असू शकते.
VinFast VF 3 च्या स्पेसिफिकेशन्स बद्दल बोलायचे झाल्यास, हे वाहन MG Comet EV प्रमाणेच दिसते, ज्यामध्ये प्रत्येक बाजूला दोन दरवाजे आणि बॉक्सी एक्स्टेरियर डिझाइन आहे.या इलेक्ट्रिक कारमध्ये हॅलोजन हेडलाइट्स, ब्लॅक-आउट ग्रिलसह क्रोम अॅक्सेंट आणि हॅलोजन टेललाईट्स दिल्या आहेत.तसेच, ब्लॅक फिनिश असलेले बंपर आणि क्लॅडिंग असलेली बॉडी या कारला अधिक आकर्षक बनवतात.
कारच्या अंतर्गत डिझाइनकडे पाहता, VinFast VF 3 च्या केबिनमध्ये दोन-स्पोक स्टीअरिंग व्हील आणि 10-इंचाचा फ्लोटिंग टचस्क्रीन आहे, जो ड्रायव्हर डिस्प्ले म्हणूनही वापरला जातो. ग्लोबल व्हेरिएंटमध्ये पूर्णपणे ब्लॅक इंटिरियर थीम असून चार प्रवाशांसाठी आरामदायक सीट्स देण्यात आल्या आहेत.यात पुढील सीट्स फोल्ड करण्याची सुविधा आहे,ज्यामुळे मागील प्रवाशांसाठी अधिक जागा निर्माण होते.
याशिवाय, या कारमध्ये मॅन्युअल एअर कंडिशनिंग आणि फ्रंट पॉवर विंडो सारखी फीचर्सही उपलब्ध आहेत.सुरक्षेच्या दृष्टीने पाहता, VinFast VF 3 मध्ये अनेक एअरबॅग्स, ABS (एंटी-लॉक ब्रेकिंग सिस्टम) आणि EBD (इलेक्ट्रॉनिक ब्रेकफोर्स डिस्ट्रिब्युशन) सारखी आधुनिक सुरक्षा वैशिष्ट्ये देण्यात आली आहेत. याशिवाय, मागील पार्किंग सेन्सरचा समावेश असून यामुळे पार्किंग अधिक सोपी होईल.
कारच्या परफॉर्मन्स बद्दल सांगायचे झाल्यास, या गाडीत 18.64 kWh क्षमतेचा बॅटरी पॅक दिला गेला आहे, जो 41 PS पॉवर आणि 110 Nm टॉर्क आउटपुट निर्माण करतो.एकदा पूर्ण चार्ज केल्यानंतर ही कार तब्बल 215 किमी पर्यंतची रेंज देऊ शकते. विशेष म्हणजे, ही कार केवळ 36 मिनिटांत 10% वरून 70% पर्यंत चार्ज केली जाऊ शकते,त्यामुळे ही एक जलद चार्जिंग इलेक्ट्रिक कार ठरणार आहे.
VinFast VF 3 ची अधिकृत किंमत लाँच झाल्यानंतरच समोर येईल, मात्र अहवालांनुसार, भारतात या कारची सुरुवातीची किंमत अंदाजे 7 लाख रुपयांपासून सुरू होऊ शकते.जर ही किंमत खरी ठरली, तर VinFast VF 3 भारतीय बाजारातील सर्वात परवडणाऱ्या इलेक्ट्रिक कार्स पैकी एक ठरू शकते.आता पाहावे लागेल की भारतीय ग्राहक या नवीन कॉम्पॅक्ट इलेक्ट्रिक कारला कसा प्रतिसाद देतात.
