Ahmednagar Breaking : शेवगाव – गेवराई रस्त्यावर रविवारी झालेल्या गोळीबारानंतर मारहाण करण्यात आलेल्या एकाचा उपचारादरम्यान मृत्यू झाला असून, त्याचे नाव अर्जुन पवार रा. पुसद, जि. यवतमाळ, असे आहे.
याप्रकरणी राजेश गणेश राठोड (वय-२८) रा. बजरंगनगर, ता. पुसद, जि. यवतमाळ यांच्या फिर्यादीवरून सुरेश उर्फ पिन्या कापसे याच्यासह १० ते १२ अनोळखी व्यक्तींवर खुनाचा प्रयत्न करणे व इतर कलमान्वये गुन्हा दाखल करण्यात आला आहे.
काल रविवारी (दि.३) रोजी दुपारी अडीचच्या सुमारास शहरातील गेवराई रस्त्यावरील तळणी फाट्याजवळी एका रसवंती गृहासमोर काळ्या रंगाच्या स्कार्पिओमध्ये बसलेल्य पिन्या कापसे याच्यावर दुचाकीवर आलेल्या पाच जणांपैकी दुचाकीवरील एकाने गोळीबार केला होता.
मात्र, यामध्ये कोणीही जखमी झाले नाही. त्यानंतर गोळीबार करणारे तेथून गेवराईकडे पळून गेले. मात्र, कापसे याने त्यांचा स्कार्पिओ गाडीने पाठलाग करुन त्यातील एका दुचाकीला मागून धडक दिली. त्यानंतर त्यांना पाडून मारहाण करण्यात आली. यामध्ये दुचाकीवरील एक जण व स्वतः कापसे जखमी झाला होता.
दोघांना अहमदनगरला उपचारासाठी दाखल केले. त्यातील अर्जुन पवार याचा पुणे येथे उपचार घेत असताना मृत्यू झाला. याबाबत राजेश राठोड यांनी दिलेल्या फियांदीत म्हटले आहे की, अन्वर (पूर्ण नाव माहिती नाही) याने यवतमाळ येथून आम्हाला शेवगाव येथे एका कामानिमित्त बोलावून घेतले.
शेवगाव येथे आल्यानंतर त्याने पाथर्डी येथे नेले. तेथे संदिप पवार याच्या शेडमध्ये जावून मुक्काम केला. रविवारी संदिप पावर याने पिन्या कापसे याचा फोटा दाखवला. दोन गावठी कट्टे व तीन कोयते घेऊन दोन दुचाकीवरून पाच जण पिन्या कापसे याचे लोकेशन घेऊन शेवगाव येथे घटनास्थळी आलो.
त्यावेळी डी.के. (पूर्ण नाव माहीत नाही) याने पिस्टल काढून दोन राऊंड कापसे याच्या दिशेने फायर केले. त्यामध्ये कापसे बचावला. नंतर आम्ही गेवराई रस्त्याच्या दिशेने पळालो. त्यावेळी कापसे व त्याच्या साथीदाराने काळ्या रंगाच्या स्कार्पिओ गाडीने आमचा पाठलाग केला व एका दुचाकीला पाठीमागून जोरदार धडक दिली,
या धडकेने आम्ही रस्त्यावर पडलो असता कापसे व त्याच्या इतर १० ते १२ साथीदारांनी आम्हाला लाकडी दांडके, लोखंडी रॉड व दगडाने मारहाण केली. त्यामध्ये अर्जुन पवार हा जबर जखमी झाला होता. या झटापटीत कापसे हाही जखमी झाला असून, त्याला अहमदनगर येथे उपचारासाठी दाखल केले.
तर पवार यास पुणे येथे उपचारासाठी दाखल केले होते. त्याचा उपचार सुरु असताना मृत्यू झाला, दरम्यान, काल दुपारी ही घटना घडली. रात्री उशिरा गुन्हा दाखल झाला. मात्र, पत्रकारांना माहिती देण्याबाबत स्थानिक पोलिसांनी टाळाटाळ केली.
