Rule Change 2025 : मार्चपासून LPG सिलिंडरच्या किमतींमध्ये वाढ झाली आहे. व्यावसायिक वापरासाठी असलेल्या १९ किलोच्या गॅस सिलिंडरच्या किमतीत ६ रुपयांची वाढ झाली आहे. गेल्या महिन्यात अर्थसंकल्पादरम्यान १९ किलोच्या सिलिंडरच्या किमतीत ७ रुपयांनी घट करण्यात आली होती, मात्र आता ती वाढवण्यात आली आहे. घरगुती सिलिंडरच्या किमतीत कोणताही बदल झालेला नाही. हे दर तेल विपणन कंपन्यांकडून दर महिन्याच्या पहिल्या तारखेला निश्चित केले जातात. यामुळे व्यावसायिक सिलिंडरचा वापर करणाऱ्या हॉटेल, रेस्टॉरंट आणि अन्य व्यवसायांवरील खर्च वाढणार आहे.
मार्चमध्ये 14 दिवस बँका बंद राहणार
बँकेत काम असेल तर, मार्च महिन्यातील बँक सुट्ट्यांची यादी तपासणे गरजेचे आहे. मार्च महिन्यात एकूण 14 दिवस बँका बंद राहणार आहेत. या सुट्ट्यांमध्ये 5 रविवार, दुसरा आणि चौथा शनिवार यासोबतच होळी (14 मार्च) आणि ईद-उल-फितर (31 मार्च) यांसारख्या सणांच्या सुट्ट्यांचा समावेश आहे.
विम्याच्या प्रीमियमसाठी UPI
1 मार्च 2025 पासून विमा प्रीमियम भरण्यासाठी UPI पेमेंट अधिक सोपे झाले आहे. विमा नियामक आणि विकास प्राधिकरणाने (IRDAI) Insurance-ASBA (Application Supported by Blocked Amount) नावाचे नवीन फीचर सादर केले आहे. याद्वारे ग्राहक त्यांच्या बँक खात्यातून विमा प्रीमियमसाठी रक्कम ब्लॉक करू शकतात आणि थेट पेमेंट करू शकतात. यामुळे ऑनलाइन पेमेंट प्रक्रिया अधिक सुरक्षित आणि जलद होईल.
व्याजदरांमध्ये संभाव्य बदल
बँकांच्या मुदत ठेवींवरील (FD) व्याजदर मार्च महिन्यात बदल होऊ शकतात. काही बँका गुंतवणुकीस प्रोत्साहन देण्यासाठी FD दर वाढवू शकतात, तर काही बँका तरलता आणि आर्थिक गरजेनुसार व्याजदर कमी करू शकतात. त्यामुळे जर कोणतीही नवीन FD सुरू करायची असेल किंवा विद्यमान FD चे नूतनीकरण करायचे असेल, तर बँकांचे नवीन व्याजदर तपासणे महत्त्वाचे ठरेल.
नॉमिनी जोडण्याचे नियम बदलले
1 मार्चपासून म्युच्युअल फंड आणि डीमॅट खात्यांसाठी नॉमिनी जोडण्याच्या नियमांमध्ये मोठा बदल झाला आहे. याआधी फक्त 1 किंवा 2 नॉमिनी जोडण्याची परवानगी होती, मात्र आता गुंतवणूकदार 10 नामनिर्देशित व्यक्ती (Nominees) जोडू शकतात. यामुळे गुंतवणूक सुरक्षित राहील आणि भविष्यात वारसदारांना निधी मिळवताना कोणतीही अडचण येणार नाही. SEBI ने 10 जानेवारी 2025 रोजी याबाबतचे परिपत्रक जारी केले होते, आणि 1 मार्चपासून ते लागू झाले आहे.
EPFO ने दिली 15 मार्चपर्यंत मुदत
कर्मचारी भविष्य निर्वाह निधी संघटनेने (EPFO) नोकरीस लागलेल्या नवीन कर्मचाऱ्यांसाठी UAN (Universal Account Number) सक्रिय करण्याची अंतिम मुदत 15 मार्चपर्यंत वाढवली आहे. पूर्वी ही मुदत 15 फेब्रुवारी होती. याशिवाय बँक खाते आधारशी लिंक करणेही अनिवार्य आहे. त्यामुळे EPF खातेदारांनी ही प्रक्रिया वेळेत पूर्ण करणे गरजेचे आहे, अन्यथा त्यांना भविष्य निर्वाह निधीशी संबंधित व्यवहारांमध्ये अडचणी येऊ शकतात.
विमान भाड्यावर परिणाम
प्रत्येक महिन्याच्या पहिल्या तारखेस तेल वितरण कंपन्या एअर टर्बाइन इंधन (ATF) चे दर पुनरावलोकन करतात. मार्च महिन्यातही ATF च्या किमतीत बदल झाला आहे, यामुळे विमान प्रवास महाग किंवा स्वस्त होण्याची शक्यता निर्माण झाली आहे. जर इंधन दर वाढले, तर विमान कंपन्या तिकीट भाड्यात वाढ करू शकतात.
आर्थिक नियोजनावर परिणाम
मार्च 2025 मध्ये लागू झालेल्या या नवीन नियमांमुळे सर्वसामान्य नागरिकांच्या आर्थिक व्यवहारांवर थेट परिणाम होणार आहे. एलपीजी सिलिंडरच्या किंमतीत वाढ झाल्यामुळे व्यवसायिक आणि हॉटेल उद्योगाचा खर्च वाढेल, तर बँकिंग आणि विमा प्रीमियम भरण्यासाठी UPI व्यवहार अधिक सोपा होणार आहे. म्युच्युअल फंड आणि डीमॅट खात्यांसाठी नॉमिनी जोडण्याच्या नव्या सुविधेमुळे वारसांना भविष्यातील प्रक्रिया सुलभ होईल. बँक सुट्ट्यांमुळे बँकिंग व्यवहारांवर परिणाम होईल, त्यामुळे नागरिकांनी आपल्या आर्थिक गरजा लक्षात घेऊन व्यवहार नियोजन करणे आवश्यक आहे.
