उन्हाच्या कडाक्याने हैराण झालेल्या नागरिकांना थंडावा मिळावा म्हणून अनेकजण शेततळे, विहिरी, बारव आणि जलसाठ्यांमध्ये पोहण्यासाठी जातात. मात्र, या ठिकाणी योग्य सुरक्षेचा अभाव आणि माहिती नसल्याने शेततळ्यात बुडून मृत्यूमुखी पडण्याच्या दुर्घटना अहिल्यानगर जिल्ह्यात वारंवार घडल्या आहेत.
या पार्श्वभूमीवर संगमनेर तालुक्यातील अशा घटना रोखण्यासाठी विशेष मोहीम राबवण्याचा निर्णय घेण्यात आला आहे. तहसीलदार धीरज मांजरे यांनी सांगितले की, शेततळ्यांभोवती संरक्षक जाळी बसवणे आवश्यक आहे,
कारण जाळी नसल्यास लोक बिनधास्तपणे पाण्यात उतरतात. शेततळ्यांमध्ये प्लास्टिकवर पाय घसरणे, गाळात अडकणे किंवा खोलीचा अंदाज न येणे यामुळे अपघात घडतात. ही परिस्थिती टाळण्यासाठी महसूल आणि कृषी विभाग एकत्रितपणे गावपातळीवर जनजागृती आणि उपाययोजना करणार आहे.
शेततळे हे पोहण्यासाठी बनवलेले नसून, त्यांचा वापर शेतीसाठी होतो. तरीही, ज्यांना पोहता येते त्यांच्यासाठीही ही ठिकाणे धोकादायक ठरू शकतात. तळ्यातील गाळ, पाण्याची अनिश्चित खोली आणि सुरक्षेच्या उपायांचा अभाव यामुळे शेततळे मृत्यूचा सापळा बनतात.
या धोक्यांबाबत नागरिकांना सजग करण्यासाठी संगमनेरात विशेष प्रयत्न केले जाणार आहेत. राष्ट्रवादी काँग्रेसचे जिल्हाध्यक्ष कपील पवार यांनीही या मुद्द्यावर पुढाकार घेतला असून,
पक्षाच्या वतीने जिल्हाभर जनजागृती मोहीम राबवली जाईल, असे जाहीर केले आहे. त्यांनी कुंपण नसलेली शेततळी धोकादायक असल्याचे नमूद करत, ग्रामस्थांच्या सुरक्षेसाठी उपविभागीय आणि तालुका कृषी अधिकाऱ्यांना निवेदन देण्याचे ठरवले आहे.
विशेषतः मुलांमध्ये पोहण्याची उत्सुकता जास्त असते, पण योग्य प्रशिक्षणाशिवाय त्यांना पाण्यात पाठवणे धोक्याचे ठरते. संगमनेरचे जलतरणपटू शिरीष मुळे यांनी सांगितले की, नदीपात्रे आणि शेततळ्यांमध्ये खोलीचा अंदाज येत नाही आणि खड्डे असल्याने अपघातांचा धोका वाढतो.
अनेकदा वाचवणारे कोणी नसल्यास जीव गमवावा लागतो, ज्यामुळे कुटुंबावर मोठा आघात होतो. त्यांनी पालकांना मुलांना एकटे पाण्यात न पाठवण्याचे आणि पोहण्याचे प्रशिक्षण प्रशिक्षकांकडून घेण्याचे आवाहन केले.
