मुंबई : महाविकास आघाडी सरकार (Mahavikas Aghadi) आणि भाजप (BJP) अशी राजकारणाची दोन समीकरणे राज्यात दिसत आहेत. या दोघांमध्ये सध्यातरी टोकाचे राजकारण पाहायला मिळत आहे. भाजप मुख्य प्रवक्ते (BJP Spokesperson) केशव उपाध्ये (Keshav Upadhyay) यांनी मुख्यमंत्री उद्धव ठाकरे (Uddhav Thackeray) यांच्यावरच निशाणा साधला आहे.
केशव उपाध्ये म्हणाले, सत्तेत आल्यावर गेली अडीच वर्षे टोमणे मारणे, कोट्या करणे यातच वाया घालवणाऱ्या उद्धव ठाकरे यांनी राज्यासमोरचे गंभीर प्रश्न सोडविण्यासाठी मुख्यमंत्री (CM) म्हणून आतातरी कामाला लागावे असा खोचक टोला त्यांनी लगावला आहे.
टोमणे ऐकत करमणूक करून घेण्याची महाराष्ट्राच्या (Maharashtra) जनतेची सहनशीलता आता संपली आहे. समस्यांना तोंड देताना जनता त्रस्त झाल्याने कामाला लागा, समस्या सोडवा असेही केशव उपाध्ये पत्रकार परिषदेमध्ये म्हणाले आहेत.
पुढे बोलताना ते म्हणाले, एसटी संप, मराठा आरक्षण, ओबीसींचे राजकीय आरक्षण याबाबत मुख्यमंत्री चकार शब्द उच्चारत नाहीत. गेल्या अडीच वर्षांत नाकर्त्या सरकारमुळे महाराष्ट्राची सर्व क्षेत्रांत नाचक्की झाली. विकासाची कामे ठप्प झाली.
खंडणीवसुली, खून, बलात्कार, भ्रष्टाचाराची पाळेमुळे थेट मंत्रालयात घुसली. मुंबई ही सोन्याचे अंडे देणारी कोंबडी आहे, असे म्हणणाऱ्या मुख्यमंत्र्यांच्या गोतावळ्याने या कोंबडीला कसे लुटले ते जाधव यांच्या पराक्रमातून जनतेसमोर आले आहे.
ठाकरे सरकारमधील (Thackeray Goverment) भ्रष्ट मंत्री अनिल देशमुख यांनी याच मुंबईतून थेट पोलिसांनाच शंभर कोटींचे खंडणीवसुलीचे टार्गेट दिले, मुख्यमंत्र्यांच्या गोतावळ्यातील यशवंत जाधव यांनी कंत्राटदारांना हाताशी थरून याच मुंबईतून कोट्यवधींची माया गोळा केली.
मातोश्रींना दोन कोटी रुपयांची रोकड आणि पन्नास लाखाचे महागडे घड्याळ भेट देणाऱ्या जाधवांच्या अफरातफरीच्या कारवाया जगासमोर उघड होऊनही मुख्यमंत्री मूग गिळून गप्प का, असा सवालही उपाध्ये यांनी केला.
या प्रकरणातील यशवंत जाधव यांच्या कथित ‘मातोश्री’चीही चौकशी व्हायला हवी अशी मागणी देखील केशव उपाध्ये यांनी केली आहे.
केशव उपाध्ये हे ठाकरे सरकारवर आरोप करताना म्हणाले, गेल्या अडीच वर्षांत ठाकरे सरकारने जनतेची एकही समस्या सोडविली नाही.
राज्यात भ्रष्टाचार, गुंडगिरी, बोकाळली. महिलांवरील अत्याचार वाढले. सामान्य कामगारांवर बेरोजगारीची वेळ आली. शेतकऱ्याना नैराश्य आले. आत्महत्या वाढल्या.
अशा भीषण परिस्थितीत मुख्यमंत्री मात्र टोमणे मारत पांचट विनोदातून जनतेची करमणूक करण्याचा प्रयत्न करीत समस्यांपासून लक्ष विचलित करण्याचा निष्फळ प्रयत्न करत आहेत असेही ते म्हणाले.
