अहमदनगर Live24 टीम, 21 फेब्रुवारी 2022 :- जिल्ह्यातील संगमनेर तालुक्यातील तहसीलदार कार्यालय सरकारी कार्यालयातील वातावरणाला छेद देणारे ठरले आहे. या कार्यालयातील बदलांची चर्चा संपूर्ण जिल्ह्यात सुरू असून, राज्यातही चांगली चर्चा रंगली आहे.
तहसील कार्यालयात कामानिमित्त येणाऱ्यांना प्रसन्नं वाटलं पाहिजे. अशी अपेक्षा महसूलमंत्री बाळासाहेब थोरात यांनी काही दिवसापूर्वी एका सार्वजनिक कार्यक्रमात व्यक्त केली होती. महसूलमंत्री बाळासाहेब थोरात यांच्या अपेक्षानुसार संगमनेरचे प्रांतधिकारी शशिकांत मंगरुळे व तहसीलदार अमोल निकम यांनी संगमनेर तहसील राज्यातील मॉडेल कार्यालय बनविण्याचा चंग बांधला.
संगमनेर तहसील कार्यालयाच्या भिंती आता येणाऱ्या प्रत्येक नागरिकांशी जणू संवाद साधत आहेत असे तिथे वातावरण निर्माण झाले आहे. यासाठी पंधरा दिवस मेहनत घेऊन रंगबेरंगी फुल-झाडांचे चित्रांनीं रंगवलेल्या भिंती, महसूली नियमावली व उपक्रमांच्या माहितीनं हे कार्यालय सजविण्यात आलं.
या कार्यालयाचे उद्घाटन नुकताचे महसूलमंत्री बाळासाहेब थोरात यांच्या हस्ते झाले. कार्यालय व परिसर स्वच्छ सुंदर करतांना पोलीसांनी जप्त केलेल्या वाळू तस्करीत सापडलेल्या वाहनांची गर्दी कमी करण्यात आली आहे. या संपूर्ण परिसरात स्वच्छता अभियान राबवून परिसर चकाचक करण्यात आला आहे.
दुसऱ्या मजल्यावर असलेल्या कार्यालयाच्या पायऱ्या चढतांना दोन्ही बाजूने असलेले झाडा-फुलांच्या चित्र तेथे रंगविण्यात आली आहेत. भिंतींवर रंगवलेली फुले-झाडे आणि पाखरांची चित्र, महसूल कायद्याच्या बोधकथा, ई-पीक पाहणी, डिजिटल सातबारा उतारा, ८ अ उतारा अशा महसूल विभागाच्या नावीन्यपूर्ण उपक्रमांची माहिती देणाऱ्या फ्रेम असे आगळे-वेगळे रूपडे घेऊन साकार झालेल्या.
यावेळी संगमनेरच्या नगराध्यक्षा श्रीमती दूर्गाताई तांबे, पोलीस अधीक्षक मनोज पाटील, अप्पर पोलीस अधीक्षक स्वाती भोर, प्रांतधिकारी शशिकांत मंगरुळे, तहसीलदार अमोल निकम उपस्थित होते. तसेच साखर आयुक्त शेखर गायकवाड यांच्या संकल्पनेतून त्यांनीच लिहिलेल्या महसुली कायद्यांच्या गोष्टी यासाठी निवडण्यात आल्या आहेत.
जमीन व्यवहाराच्या गोष्टी, मुखत्यापत्र, हक्क नोंदणी, एका जमिनीचे दोनदा व्यवहार, देवाची जमीन, जमीनीचे वाटप, वारस नोंद अशा वेगवेगळ्या विषयांच्या छोटेखानी बोधकथांचा वापर करून कार्यालयाच्या आवारातील सर्व भिंतींवर त्याच्या फ्रेम करुन त्या लावण्यात आल्या आहेत.
यासोबतच ७/१२ उतारा म्हणजे काय? ८ अ उतारा कशाला म्हणतात? याबाबतही सामान्यांना माहिती देण्यात आली आहे. यामुळे कार्यालयात प्रवेश करताच प्रसन्न तर वाटतेच मात्र कामासाठी जास्त वेळ थांबवा लागणे कंटाळवाणे न ठरता ज्ञान व माहिती देणारे ठरत आहे. या उपक्रमाचे थोरात यांनी कौतूक केले असून राज्यभर असा उपक्रम राबविण्याच्या सूचना केल्या आहेत.
