IMD Alert : देशात कडाक्याची थंडी वाढत असताना तापमानात घट दिसून येत आहे. अशा वेळी हवामान विभागाने देशात अनेक राज्यांमध्ये पाऊसाचा अंदाज दिला आहे.
हवामान खात्याच्या म्हणण्यानुसार, मंडूस चक्रीवादळामुळे या राज्यांमध्ये पुढील दोन ते तीन दिवस मुसळधार पाऊस सुरू राहील. मंडूस चक्रीवादळाच्या पार्श्वभूमीवर हवामान खात्याने मच्छिमारांनी पुढील तीन ते चार दिवस समुद्रात जाऊ नये, असे आवाहन केले आहे. यासोबतच सर्वसामान्यांना किनारी भागापासून दूर राहण्यास सांगण्यात आले आहे, जेणेकरून त्यांची जीवित व वित्तहानी टाळता येईल.
मंडस चक्रीवादळाच्या पार्श्वभूमीवर, प्रभावित राज्यांमध्ये अनेक सावधगिरीची पावले उचलण्यात आली आहेत. तामिळनाडू SDRF च्या 40 सदस्यीय टीम व्यतिरिक्त 16,000 पोलीस आणि 1,500 होमगार्ड तैनात करण्यात आले आहेत.
यासोबतच 12 डीडीआरएफ टीमही सज्ज ठेवण्यात आल्या आहेत. कावेरी डेल्टा प्रदेशासह किनारपट्टी भागात NDRF आणि SDRF चे सुमारे 400 जवान आधीच तैनात करण्यात आले आहेत.
यामध्ये जम्मू-काश्मीर, हिमाचल प्रदेश, उत्तराखंड, पंजाब, हरियाणा, राजस्थान, मध्य प्रदेश, दिल्ली, उत्तर प्रदेश, बिहार, झारखंडसह अनेक राज्यांमध्ये तापमान झपाट्याने खाली येत आहे.
परिस्थिती अशी आहे की, डिसेंबरच्या दुसऱ्या आठवड्यातच देशाच्या अनेक भागात थंडीची लाट सुरू झाली आहे. त्यामुळे नागरिकांच्या अडचणीत सातत्याने वाढ होत आहे.
खरं तर, वेस्टर्न डिस्टर्बन्समुळे जम्मू-काश्मीर, हिमाचल प्रदेश आणि उत्तराखंडच्या पर्वतांवर गेल्या अनेक दिवसांपासून सतत बर्फवृष्टी आणि पाऊस पडत आहे. भारतीय हवामान खात्यानुसार, पुढील काही दिवस गिलगिट-बाल्टिस्तान, मुझफ्फराबाद, लडाख, जम्मू-काश्मीर, हिमाचल प्रदेश आणि उत्तराखंडच्या पर्वतरांगांमध्ये बर्फवृष्टीसह पाऊस पडण्याची शक्यता आहे. दरम्यान, वेस्टर्न डिस्टर्बन्स उत्तर पाकिस्तान आणि त्याच्या लगतच्या भागाच्या पलीकडे सरकण्याची शक्यता असल्याने येत्या तीन-चार दिवसांत हवामानाच्या पद्धतीत बदल होऊ शकतो.
तर दुसरीकडे डोंगराळ भागातून वाहणाऱ्या बर्फाळ वाऱ्यांचा परिणाम मैदानी भागावर स्पष्टपणे दिसून येत आहे. मैदानी भागात दिवस आणि रात्रीच्या तापमानात झपाट्याने घट होत आहे.
दिल्ली-NCR (Delhi NCR Weather) मध्ये थंडीचा प्रभाव हळूहळू दिसून येत आहे. तथापि, डिसेंबर महिन्यात सामान्यतः तितकी थंडी अजूनही नाही.
दरम्यान, सकाळ-संध्याकाळ मैदानी भागात धुके पडण्याची शक्यता असून पहाटेच्या सुमारास डोंगरावर दंव पडण्याची शक्यता आहे. अनेक ठिकाणी धुके पडायला सुरुवात झाली आहे.
सकाळी अनेक भागात धुक्यामुळे दृश्यमानता खूपच कमी होते. त्यामुळे वाहतुकीवर मोठा परिणाम होत आहे. लांब पल्ल्याच्या गाड्यांनाही धुक्याचा सर्वाधिक फटका बसत आहे. धुक्यामुळे गाड्यांनाही विलंब होत आहे. त्यामुळे प्रवाशांना अडचणींचा सामना करावा लागला.
खाजगी हवामान अंदाज एजन्सी स्कायमेट हवामानानुसार, दक्षिण आंध्र प्रदेश, दक्षिण कर्नाटक, उत्तर अंतर्गत तामिळनाडू, तेलंगणा, दक्षिण ओडिशा, विदर्भ, मराठवाडा आणि दक्षिण मध्य महाराष्ट्राच्या अनेक भागात हलका ते जोरदार पाऊस अपेक्षित आहे. तर गिलगिट-बाल्टिस्तान, मुझफ्फराबाद, लडाख, जम्मू काश्मीर, हिमाचल प्रदेश आणि उत्तराखंडमध्ये बर्फासह हलका पाऊस पडू शकतो.
