नागपूर : मुख्यमंत्री उद्धव ठाकरे (CM Uddhav Thackeray) यांचे मेहुणे श्रीधर पाटणकर (Shridhar Patankar) यांच्या ठाण्यातील मालमत्तेवर ईडीने कारवाई केली आहे. त्यावरून राज्यात चांगलेच राजकारण तापले आहे. शिवसेना नेते संजय राऊत (Sanjay Raut) यांनी भाजपला गंभीर इशारा दिला आहे.
रश्मी ठाकरे (Rashmi Thackeray) यांचे बंधू श्रीधर पाटणकर यांच्या ठाण्यातील ११ सदनिकावर ईडीने (ED) कारवाई केली आहे. त्यामुळे भाजपला शिवसेनेवर टीका आणि आरोप करण्याची चालून संधी आल्याचे दिसत आहे.
संजय राऊत म्हणाले, ईडीच्या कारवाया करून दबाव आणू सरकार पडेल आणि राष्ट्रपती राजवट लागेल असं वाटत असेल तर झोपेतून जागे व्हा.
आम्ही लढू तुमचं राजकीय षडयंत्रं आम्ही लोकांसमोर आणू, असं ललकारतानाच अशा वातावरणात आम्ही न्यायालयाकडून न्यायाची अपेक्षा करू शकत नाही.
अशा परिस्थितीत न्यायालयेही दबावाखाली आहेत. त्यामुळे आम्ही जनतेच्या न्यायालयात जाऊन दाद मागू. महाराष्ट्रातील जनता ठाकरे परिवाराला ओळखते.
कधी ना कधी भाजपला (BJP) याची किंमत चुकवावीच लागेल, असा गंभीर इशारा संजय राऊत यांनी भाजपला दिला आहे. ईडीने आतापर्यंत अनेक कारवाया केल्या.
3 हजार लोकांपैकी फक्त 20 लोकांना कोर्टाने शिक्षा ठोठावली. बाकी केस अधांतरी आहेत. राजकीय सूडाच्या कारवाया अशाच असतात. खोटे साक्षीदार नेमले जातात.
भ्रम तयार केला जातो. महाराजाच्या महाराष्ट्राला, ज्यांनी या देशाला राज्य घटना दिली, कायदा दिला त्या आंबेडकराचंया महाराष्ट्राला बदनाम करण्याची संधी भाजपच्या टाचेखाली असलेल्या केंद्रीय तपास यंत्रणा सोडत नाहीत असेही संजय राऊत म्हणाले.
ही हुकूमशाहीची खतरनाक सुरुवात आहे. चार राज्यात जिंकलात म्हणून तुम्ही देशाचे मालक बनला नाही. आम्हाला तुरुंगात टाकायचे असेल तर तयारी करा आम्ही तुरुंगात जाऊ. या देशाच्या स्वातंत्र्यासाठी आम्ही पुन्हा न्यायालयात जाऊ असेही संजय राऊत यांनी भाजपला ठणकावून सांगितले आहे.
