मुंबई : राष्ट्रवादी काँग्रेसचे (NCP) अध्यक्ष शरद पवार (Sharad Pawar) यांनी देवेंद्र फडणवीस (Devendra Fadanvis) यांच्या विधानसभेतील पेनड्राईव्ह बॉम्ब (Pendrive Bomb) वर प्रतिक्रिया देत अनेक सवाल उपस्थित केले आहेत. मुंबईमध्ये (Mumbai) पत्रकारांशी बोलताना पवारांनी फडणवीस यांच्यावर टीकाही केली आहे.
शरद पवार म्हणाले, ज्या काही गोष्टी त्यांनी सांगितल्या त्याच्या खोलात मी गेलो नाही. मी कौतुक वाटलं एका शासकीय अधिकाऱ्याच्या कार्यालयात जाऊन त्याच्या संबंधीत १२५ तासांची रेकॉर्डिंग हे करण्यासाठी फडणवीस किंवा त्यांचे सहकारी यशस्वी झाले ही कौतुकास्पद बाब आहे.
१२५ तास रेकॉर्डिंग करायचे याचा अर्थ ही प्रक्रिया किती तास चालली असेल याचा हिशोब केला तर ही कौतुकास्पद बाब आहे. १२५ तास रेकॉर्डिंग काम करण्याचं काम खरंच असेल तर शक्तीशाली एजन्सीचा वापर केला असण्याची शक्यता नाकारता येत नाही.
अशा एजन्सी या फक्त भारत सरकारकडे आहेत. त्यामुळे राज्यात जाऊन राज्यात जाऊन राज्य सरकारच्या एखाद्या कार्यालयात जाऊन तास न् तास जे काही काम केले टेप केले रेकॉर्ड करायला ते यशस्वी झाले ते खरं आहे की नाही ते सिद्ध झाले पाहिजे. असेही शरद पवार म्हणाले आहेत.
पुढे बोलताना शरद पवार म्हणाले, या संपूर्ण प्रकरणाची राज्य सरकार चौकशी करेल. त्याची सत्यता असत्यता तपासेल. त्यात माझंही नाव घेतलेले दिसतं. माझे कधी या संबंधात कुणाशी बोलणे व्हायचे कारण नाही.
कधी काळी वर्ष सहा महिन्यानंतर देवेंद्र फडणवीसांच्या सहकाऱ्याबाबत तक्रार आली होती. मी त्यांना कळवली. त्यांना सांगितले त्यात सत्यता किती तुम्ही पाहा. तुमच्या सहकाऱ्याबाबतची ही तक्रार आहे.
एखादी व्यक्ती सार्वनिक जीवनात कार्य करते तेव्हा त्यावर शहानिशा न करता बोलणे योग्य नाही. त्यामुळे मी त्यावर भाष्य करणार नाही. तुम्ही पाहून घ्या. त्यानंतर त्यांच्याकडून मला एवढंच कळले की तुम्ही सांगितलेल्या लोकांच्या तक्रारीत मी लक्ष घातले.
अशा प्रकारच्या गोष्टी होता कामा नयेत याची काळजी घेईल. हा प्रश्न माझ्याबाबत तिथे संपला. असेही शरद पवार यांनी माध्यमांशी बोलताना सांगितले आहे.
