जळगाव : केंद्रीय मंत्री स्मृती इराणी (Smriti Irani) यांच्या सोमवारच्या पुणे दौऱ्यात मोठा राडा झाला असून त्या ठिकाणी भाजपच्या (Bjp) काही कार्यकर्त्यांनी महिलांना मारहाण केल्याचा आरोप राष्ट्रवादीकडून करण्यात आला आहे.
या प्रकरणावरून राष्ट्रवादी काँग्रेसच्या (Ncp) खासदार सुप्रिया सुळे (Supriya Sule) यांनी संताप व्यक्त करत असे कृत्य करणाऱ्यांचे हात तोडून हातात देईन असा थेट इशारा दिला आहे.
जळगावमध्ये (Jalgoan) बोलत असताना सुप्रिया सुळे म्हणाल्या, भाजप पक्षातील एक कार्यकर्ता महिलेवर हात उचलतो, त्या पक्षाला लाच वाटली पाहिजे. महिलेवर हात उचलणाऱ्या कार्यकर्त्याला भाजपनं पक्षातून काढायला हवं. असे कृत्य महाराष्ट्रात (Maharashtra) कधीही झालं नाही.
भाजपनं महाराष्ट्रात हे कृत्य केलं आहे. भाजपकडून महिलांवर अन्याय होत राहिल्यास आम्ही त्यांना आमच्या भाषेत उत्तर देऊ. महिलांच्या सहनशीलतेचा अंत पाहू नका. काल महिलेच्या अंगावर एकदा हात उगारला, पुन्हा उगारू नका. कारण आता अती झालं आहे.
बेटी बचाव बेटी पढाओ संस्कृती सांगणाऱ्यांची ही संस्कृती आहे का? माझ्या महिला कार्यकर्त्याने चूक केली असती तर मी स्वत: स्मृती इराणी यांची माफी मागितली असती. त्यांना माफी मागण्यात काही कमीपणा नव्हता. जे चूक आहे ते चूक आहे.
एखादी घोषणा दिल्यानं हात उगारला जातो हाच यांचा पुरुषार्थ आहे का? असा सवाल सुप्रिया सुळे यांनी विचारलाय. त्याचबरोबर यापुढे महाराष्ट्रात कुठल्याही पुरुषाने कुठल्याही पक्षातील महिलेवर हात उगारला तर हात तोडून हातात देईन, असा इशारा यावेळी त्यांनी दिला आहे.
दरम्यान, बांलगंधर्व रंगमंदिरात स्मृती इराणी यांच्या उपस्थित भाजपचा कार्यक्रम सुरु असताना राष्ट्रवादीच्या महिला कार्यकर्त्यांनी (NCP women activists) गोंधळ घातला होता. त्यावेळी या कार्यकर्त्यांना पोलीस (Police) घेऊन जात असताना भाजपच्या काही कार्यकर्त्यांनी त्यांना मारहाण केल्याचा आरोप राष्ट्रवादीकडून करण्यात आला आहे.
