Best Picnic Spot : बजेट कमी आहे, पण निळ्याशार समुद्राच्या काठावर शांत आणि निसर्गरम्य सुट्टी घालवायची इच्छा अनेकांची असते. मालदीव हे स्वप्नातील पर्यटनस्थळ असले तरी तेथे जाण्याचा खर्च सर्वसामान्यांच्या आवाक्याबाहेर जातो. मात्र, आता कमी बजेटमध्ये मालदीवसारखा अनुभव घ्यायचा असेल, तर महाराष्ट्रातीलच एक सुंदर ठिकाण पर्यटकांना भुरळ घालत आहे. कोकणातील तारकर्ली बीच सध्या ‘मिनी मालदीव’ म्हणून ओळखला जाऊ लागला आहे.
मालवण तालुक्यात वसलेला तारकर्ली बीच हा कोकणातील सर्वात स्वच्छ आणि सुंदर समुद्रकिनाऱ्यांपैकी एक मानला जातो. येथील समुद्राचे पाणी निळसर आणि पारदर्शक असल्यामुळे पर्यटकांना अगदी मालदीवमधील समुद्रकिनाऱ्याची आठवण होते. विशेष म्हणजे, इतर प्रसिद्ध बीचप्रमाणे येथे प्रचंड गर्दी नसल्याने शांतता अनुभवता येते.
तारकर्ली बीचचे आणखी एक आकर्षण म्हणजे स्कुबा डायव्हिंग आणि स्नॉर्कलिंग. कमी खर्चात समुद्रातील रंगीबेरंगी मासे, प्रवाळ (कोरल्स) आणि जलसृष्टी जवळून पाहण्याची संधी येथे मिळते. त्यामुळे साहसी पर्यटनाची आवड असणाऱ्यांसाठी हे ठिकाण खास ठरते. याशिवाय बोटिंग, जेट स्की, पॅरासेलिंग यांसारखे जलक्रीडा प्रकारही येथे उपलब्ध आहेत.
सकाळचा मनमोहक सूर्योदय आणि संध्याकाळचा लालबुंद सूर्यास्त पाहण्यासाठीही तारकर्ली बीच प्रसिद्ध आहे. समुद्रकिनाऱ्यावर बसून निसर्गाचा हा अद्भुत खेळ पाहताना मनाला वेगळाच आनंद मिळतो. कुटुंबासोबत, मित्रांसोबत किंवा जोडप्यांसाठीही हे ठिकाण अत्यंत सुरक्षित आणि आनंददायी मानले जाते.
तारकर्लीमध्ये स्थानिक होमस्टे, रिसॉर्ट्स आणि साधी पण स्वादिष्ट मालवणी खवय्यांची सोय असल्यामुळे खर्च नियंत्रणात राहतो. त्यामुळे महागड्या परदेशी सहलीऐवजी, स्वस्तात आणि सहज उपलब्ध असलेला हा ‘मिनी मालदीव’ पर्यटकांची पहिली पसंती ठरत आहे. कमी बजेटमध्ये निसर्ग, शांतता आणि समुद्राचा आनंद घ्यायचा असेल, तर तारकर्ली बीच नक्कीच भेट द्यावा असेच आहे.
