Gudi Padwa 2025 : येत्या रविवारी, ३० मार्च रोजी गुढीपाडवा साजरा होणार आहे. या दिवशी सूर्योदयापासून दुपारी १ वाजेपर्यंत गुढी उभारावी आणि सूर्यास्तापूर्वी ती उतरवावी, अशी माहिती ठाण्याचे ज्येष्ठ पंचांगकर्ते आणि खगोल अभ्यासक दा. कृ. सोमण यांनी दिली आहे.
गुढीपाडवा हा मराठी नववर्षाचा पहिला दिवस असून, यंदा शालिवाहन शक १९४७ मधील विश्वावसू नाम संवत्सराचा प्रारंभ होत आहे. या वर्षात हिंदू पंचांगानुसार काही विशेष खगोलीय घटना आणि योग घडणार असल्याचेही त्यांनी सांगितले.
दा. कृ. सोमण यांनी दिलेल्या माहितीनुसार, यंदा चैत्र शुक्ल प्रतिपदा ही क्षय तिथी असल्याने गुढीपाडवा साजरा करण्याची वेळ सकाळी ६.५३ नंतर आहे. या वर्षात गुरुवारपासून सुरुवात होऊन गुरुवारलाच समाप्ती होणार आहे.
अशी परिस्थिती यापूर्वी २०१७ मध्ये शके १९३९ मध्ये घडली होती, जेव्हा एकाच वर्षात दोनदा गुढीपाडवा आला होता. पुढील असा प्रसंग २०३२ मध्ये शके १९५४ मध्ये येणार आहे.
या वर्षाच्या वैशिष्ट्यांबद्दल सांगताना सोमण यांनी नमूद केले की, या नवीन संवत्सरात चार ग्रहणे होणार आहेत. त्यापैकी ७ सप्टेंबर २०२५ आणि ३ मार्च २०२६ रोजी होणारी चंद्रग्रहणे भारतातून दिसतील, तर २१ सप्टेंबर २०२५ आणि १७ फेब्रुवारी २०२६ रोजी होणारी सूर्यग्रहणे भारतातून दिसणार नाहीत.
या संवत्सरात आणखी काही महत्त्वाचे योगही असणार आहेत. सोमण यांनी सांगितले की, २४ जुलै, २१ ऑगस्ट आणि १८ सप्टेंबर या तारखांना तीन गुरुपुष्य योग येतील. हे योग शुभ कार्यांसाठी विशेष मानले जातात.
त्याचप्रमाणे, ६ जानेवारी २०२६ रोजी एकमेव अंगारक संकष्ट चतुर्थी असेल. या खगोलीय आणि पंचांगातील माहितीमुळे यंदाचा गुढीपाडवा आणि नवीन संवत्सर यांचे महत्त्व अधिक अधोरेखित होते. गुढी उभारण्याचा शास्त्रशुद्ध मुहूर्त आणि या वर्षातील खगोलीय घटनांची माहिती नागरिकांना नववर्षाच्या स्वागतासाठी उपयुक्त ठरेल, असे सोमण यांनी स्पष्ट केले.
