Maharashtra Picnic Spot : धकाधकीच्या दैनंदिन जीवनातून थोडा वेळ काढून निसर्गाच्या सानिध्यात शांतता अनुभवण्याची इच्छा प्रत्येकालाच असते. मात्र वेळेच्या अभावामुळे अनेकांना लांबच्या सहली शक्य होत नाहीत. अशा वेळी मुंबई आणि पुणेकरांसाठी एकदिवसीय पिकनिक हा सर्वोत्तम पर्याय ठरतो.
महाराष्ट्रात अशी अनेक पर्यटनस्थळे आहेत, जिथे सकाळी निघून संध्याकाळपर्यंत आरामात परत येता येते. आज आपण अशाच पाच लोकप्रिय आणि सहज पोहोचता येणाऱ्या ठिकाणांबद्दल जाणून घेणार आहोत.
१. लोणावळा आणि खंडाळा
लोणावळा-खंडाळा हे मुंबई-पुणेकरांचे कायमचे फेव्हरेट पर्यटनस्थळ आहे. हिरवीगार डोंगररांग, धबधबे आणि आल्हाददायक हवामान यामुळे येथे नेहमीच पर्यटकांची गर्दी असते.
टायगर पॉईंट, भुशी डॅम, राजमाची पॉईंट ही ठिकाणे पाहण्यासारखी असून, लोणावळ्याची प्रसिद्ध चिक्की खरेदी करण्यासाठी पर्यटक आवर्जून थांबतात. मुंबईपासून सुमारे ८० किमी तर पुण्यापासून ६५ किमी अंतरावर हे ठिकाण आहे.
२. माथेरान
वाहनांना बंदी असलेले माथेरान हे आशियातील एकमेव प्रदूषणमुक्त हिल स्टेशन म्हणून ओळखले जाते. लाल मातीचे रस्ते, घनदाट जंगल आणि शांत वातावरण यामुळे येथे आल्यावर शहराचा गोंगाट विसरायला होतो.
पॅनोरमा पॉईंट, इको पॉईंट आणि टॉय ट्रेनचा अनुभव पर्यटकांना विशेष आवडतो. मुंबईपासून ८५ किमी अंतरावर असलेले माथेरान एकदिवसीय सहलीसाठी उत्तम आहे.
३. अलिबाग
समुद्रकिनाऱ्याची भुरळ घालणारे अलिबाग हे कोकणातील लोकप्रिय पर्यटनस्थळ आहे. वरसोली बीच, अलिबाग बीच आणि ऐतिहासिक कुलाबा किल्ला येथे पाहण्यासारखे आहेत. मुंबईकरांसाठी रो-रो फेरीमुळे प्रवास अधिक सोयीचा झाला आहे. मुंबईपासून अवघ्या एका तासात फेरीने पोहोचता येणारे अलिबाग विकेंडसाठी आदर्श ठिकाण ठरते.
४. मुळशी धरण
निसर्गप्रेमी आणि फोटोग्राफीची आवड असणाऱ्यांसाठी मुळशी धरण हा उत्तम पर्याय आहे. ताम्हिणी घाट, धरणाचा विस्तीर्ण परिसर आणि हिरवीगार झाडी मन प्रसन्न करते. पुण्यापासून केवळ ४५ किमी अंतरावर असलेले मुळशी कुटुंबासोबत शांत वेळ घालवण्यासाठी योग्य आहे.
५. लोहगड किल्ला
इतिहास आणि ट्रेकिंगचा आनंद एकत्र अनुभवायचा असेल तर लोहगड किल्ल्याला भेट द्यावी. विंचू काटा बुरुज, भाजे लेणी आणि पवना धरणाचा परिसर पर्यटकांना आकर्षित करतो. चढायला सोपा असल्याने लहान-मोठ्यांसाठी हा किल्ला आदर्श आहे.
एकूणच, वेळ आणि पैशांची बचत करत विकेंडला निसर्ग, इतिहास आणि शांततेचा अनुभव घ्यायचा असेल, तर ही एकदिवसीय पर्यटनस्थळे नक्कीच उत्तम पर्याय ठरू शकतात.
