Maharashtra Tourism : महाराष्ट्रात सह्याद्रीच्या कुशीत वसलेली अनेक निसर्गरम्य पर्यटनस्थळे आहेत. धबधबे, घाटरस्ते, किल्ले आणि हिरवळीने नटलेली ही ठिकाणे पर्यटकांना नेहमीच भुरळ घालतात. माळशेज घाट, भंडारदरा, लोणावळा ही ठिकाणे प्रसिद्ध असली तरी सातारा जिल्ह्यातील तापोळा हे ठिकाण आता ‘महाराष्ट्राचे मिनी स्वित्झर्लंड’ म्हणून ओळखले जाऊ लागले आहे.
महाबळेश्वरपासून अवघ्या २५ ते ३० किलोमीटर अंतरावर असलेले तापोळा हे खऱ्या अर्थाने पर्यटकांचे छुपे नंदनवन ठरत आहे. कोयना धरणाच्या शिवसागर जलाशयाच्या काठावर वसलेले तापोळा अथांग निळ्याशार पाणी, सभोवतालची दाट हिरवळ आणि शांत वातावरण यामुळे वेगळेच आकर्षण निर्माण करते.
जवळपास ९० किलोमीटरपर्यंत पसरलेले कोयना धरणाचे बॅकवॉटर पाहताना स्वित्झर्लंडमधील प्रसिद्ध ‘लेक ल्युसर्न’ची आठवण झाल्याशिवाय राहत नाही. त्यामुळेच तापोळ्याला ‘मिनी स्वित्झर्लंड’ ही उपमा दिली जाते.
तापोळ्यातील प्रमुख आकर्षण म्हणजे बोटिंग आणि जलक्रीडा. शिवसागर जलाशयात तासनतास बोटिंगचा आनंद घेता येतो. पाण्यावरून दिसणारे डोंगर, जंगल आणि निसर्गरम्य दृश्ये मनाला मंत्रमुग्ध करतात.
साहसी पर्यटकांसाठी येथून वासोटा किल्ल्याचा ट्रेक हा खास अनुभव ठरतो. बोटीने किल्ल्याच्या पायथ्याशी जाऊन जंगलातून चढाई करण्याचा थरार अनेकांना आकर्षित करतो.
महाबळेश्वरच्या जवळ असल्याने येथे स्ट्रॉबेरी शेती मोठ्या प्रमाणावर केली जाते. हंगामात ताज्या, गोड स्ट्रॉबेरीचा आस्वाद घेणे हा पर्यटकांसाठी वेगळाच आनंद असतो. तसेच तापोळ्याच्या आसपास अनेक अॅग्रो-टुरिझम रिसॉर्ट्स असून, येथे ग्रामीण जीवनशैली, घरगुती जेवण आणि निसर्गाचा मनमुराद आनंद घेता येतो.
लोणावळा किंवा महाबळेश्वरसारखी प्रचंड गर्दी तापोळ्यात नसल्याने, शहरी गजबजाटापासून दूर शांतता शोधणाऱ्यांसाठी हे ठिकाण आदर्श ठरते.
महाबळेश्वरला पोहोचल्यानंतर स्थानिक टॅक्सी किंवा खासगी वाहनाने सातारा रोडने सहज तापोळ्याला जाता येते. निसर्ग, शांतता आणि साहस यांचा अनोखा संगम अनुभवायचा असेल, तर ‘महाराष्ट्राचे मिनी स्वित्झर्लंड’ तापोळा एकदा नक्कीच भेट देण्यासारखे ठिकाण आहे.
