Maharashtra News : देशातील पहिल्या एलएनजी (लिक्विफाइड नॅचरल गॅस) इंधनावर रूपांतरीत करण्यात येणाऱ्या एसटी महामंडळाच्या वाहन प्रकल्पाचे उद्घाटन शुक्रवारी मुख्यमंत्री एकनाथ शिंदे यांच्या हस्ते ‘वर्षा’ निवासस्थानी करण्यात आले.
एसटी महामंडळातील ५ हजार डिझेल वाहनांचे एलएनजी (लिक्विफाइड नॅचरल गॅस) या पर्यायी इंधनावर चालणाऱ्या वाहनांमध्ये रुपांतरण करण्यात येणार आहे. उद्घाटनावेळी मुख्यमंत्र्यांनी एलएनजी रूपांतरणामुळे एसटी बसमधील बदल, डिझेलच्या तुलनेत होणारे लाभ याविषयी माहिती घेतली आणि बसचे निरीक्षण केले.
महामंडळाकडे डिझेलवर चालणारे सुमारे १६ हजार प्रवासी वाहने आहेत. महामंडळाच्या एकूण खर्चापैकी सुमारे ३४ टक्के खर्च हा इंधनावर म्हणजेच डिझेलवर केला जातो. डिझेलच्या दरात होणारी वाढ लक्षात घेता व हरित परिवहनाची संकल्पना राबवण्यासाठी डिझेलऐवजी पर्यायी इंधन वापरणे ही काळाची गरज आहे.
यामुळे टप्प्याटप्याने पूर्ण एसटी महामंडळातील वाहने एलएनजी इंधनावर आधारित करण्यात येणार आहे. राज्य शासनाच्या उद्योग विभागाने राज्यास एलएनजी या पर्यायी इंधनाचा पुरवठा करण्यासाठी मे. किंग्सगॅस प्रा. लि. यांच्याबरोबर सामंजस्य करार केलेला असून त्यामध्ये परिवहनसाठी सुद्धा एलएनजीचा वापर व पुरवठा याचा समावेश करण्यात आला आहे.
डिझेल इंधनाच्या वाहनांमुळे होणाऱ्या प्रदूषणामध्ये एलएनजीमुळे सुमारे १० टक्के घट होणार आहे. निश्चितच महामंडळाचा इंधनावरील खर्च कमी होणार आहे. महामंडळाच्या सुमारे ९० आगारांत एलएनजी वितरण केंद्रही उभारण्यात येणार असल्याचे एसटी महामंडळाकडून सांगण्यात आले.
दरम्यान, या उद्घाटन प्रसंगी सार्वजनिक बांधकाम मंत्री रवींद्र चव्हाण, शालेय शिक्षण मंत्री दीपक केसरकर, एसटी महामंडळाचे उपाध्यक्ष तथा व्यवस्थापकीय संचालक डॉ. माधव कुसेकर, महाव्यवस्थापक नंदकुमार कोलारकर, वैभव वाकोडे, मे. किंग्ज गॅस प्रा. लि. कंपनीचे व्यवस्थापकीय संचालक मोहम्मद आझम कुरेशी आदी उपस्थित होते.
