Maharashtra News : मुंबई पदवीधर मुंबई शिक्षक व कोकण पदवीधर मतदार संघासाठी नव्याने मतदार यादी तयार करण्यासाठी निवडणूक आयोगाकडून ३० सप्टेंबर ते ३० डिसेंबर हा कालावधी जाहीर करण्यात आला आहे कोकण विभागातील पदवीधरांनी जास्तीत जास्त प्रमाणात मतदार नोंदणीसाठी सहभाग घ्यावा, असे आवाहन कोकण विभागीय आयुक्त डॉ. महेंद्र कल्याणकर यांनी केले.
निवडणूक आयोगाकडून मुंबई पदवीधर, मुंबई शिक्षक व कोकण पदवीधर मतदारसंघासाठी नव्याने मतदार याद्या तयार करण्यात येणार आहेत. त्यासाठी ३० सप्टेंबर ते ३० डिसेंबर या कालावधीत मतदार नोंदणीसाठी जाहीर सूचना प्रसिद्ध करणे,
नमुना १८ किंवा नमुना १९ द्वारे दावे व हरकती स्वीकारणे, हस्तलिखिते तयार करणे व प्रारूप मतदार याद्यांची छपाई करणे, ती प्रसिद्ध करणे, दावे व हरकती निकाली काढून पुरवणी यादी तयार करून छपाई करणे आदी कामे केली जाणार आहेत.
त्यानंतर मतदार याद्यांची अंतिम प्रसिध्दी करण्यात येणार आहे. शिक्षक मतदार संघाच्या सध्या अस्तित्वात असलेल्या यादीमध्ये ज्या व्यक्तीची नावे समाविष्ट आहेत अशा सर्व व्यक्तींना नवीन यादी तयार नावे समाविष्ट आहेत करताना विहित नमुन्यात नव्याने अर्ज सादर करणे बंधनकारक आहे.
१ नोव्हेंबर २०२३ पूर्वी लगतच्या सहा वर्षांमध्ये राज्यातील एखादया माध्यमिक शैक्षणिक संस्थेमध्ये किमान तीन वर्ष अध्यापनाचे काम केले आहे, अशी व्यक्ती शिक्षक मतदार संघाच्या यादीमध्ये नाव समाविष्ट करण्यास पात्र राहणार आहे.
मतदार यादीत नाव दाखल करण्यासाठी सादर केलेला नमुना १९ मधील अर्जासोबत संबंधित व्यक्तीने १ नोव्हेंबर २०२३ पूर्वी लगतच्या सहा वर्षांमध्ये माध्यमिक शाळेच्या शैक्षणिक संस्थेमध्ये किमान तीन वर्ष अध्यापनाचे काम केले असल्याबाबत शैक्षणिक संस्था प्रमुखाचे प्रमाणपत्र जोडणे आवश्यक आहे.
पदवीधर मतदार संघाच्या सध्या अस्तित्वात असलेल्या यादीमध्ये ज्या व्यक्तींची नावे समाविष्ट आहेत अशा सर्व व्यक्तींना सुध्दा नवीन यादी तयार करताना विहित नमुन्यात नव्याने अर्ज सादर करणे बंधनकारक आहे. जी व्यक्ती भारताची नागरिक आहे आणि त्या मतदार संघातील सर्वसाधारण रहिवासी आहे आणि ती १ नोव्हेंबर २०२३ पूर्वी किमान ३ वर्षे भारताच्या राज्यक्षेत्रातील विद्यापीठाची पदवीधर असेल किंवा त्याच्याशी समतुल्य असलेली अर्हता धारण केलेली
अशी प्रत्येक व्यक्ती पदवीधर मतदार संघाच्या मतदार यादीमध्ये नाव समाविष्ट करण्यास पात्र राहणार आहे. नमुना १८ मधील अर्जासोबत पदवीशी समतुल्य म्हणून निर्दिष्ट करण्यात आलेली अर्हता स्वसाक्षांकित केलेला पुरावा व अतिरिक्त पदनिर्देशित अधिकाऱ्यांनी अधिप्रमाणीत करून जोडणे आवश्यक आहे.
नमुना १८ मधील छापील अर्ज मतदार नोंदणी अधिकारी/सहाय्यक मतदार नोंदणी अधिकारी/ पदनिर्देशित अधिकारी यांच्या कार्यालयाकडून मिळविता येणार असून हस्तलिखीत टंकलिखीत चक्रमुद्रीत किंवा खाजगीरित्या छापलेले अर्ज देखील स्वीकारले जातील. खोटे निवेदन व खोटी माहिती देणाऱ्या व्यक्ती विरोधात कारवाई करण्यात येणार आहे.
पदवीधर संघातील मतदारांची संख्या वाढावी यासाठी ठिकठिकाणी कॅम्प घेऊन त्याच ठिकाणी पदवीधरांची नोंदणी करून घेण्याच्या तसेच विद्यापीठात जाऊन माहिती देण्याचे तसेच कॅम्प घेण्याचे जिल्हाधिकाऱ्यांना सूचित करण्यात आले आहे.
त्याचप्रमाणे शाळेत जाऊन शिक्षकांची सुद्धा नोंदणी करून घेण्यासंदर्भात सूचना देण्यात आल्या आहेत. जास्तीत जास्त पदवीधर तसेच शिक्षकांनी आपली नोंदणी करून घ्यावी. -महेंद्र कल्याणकर, विभागीय आयुक्त, कोकण विभाग
