Indian Railways | भारतीय रेल्वेने आता प्रवाशांच्या खाद्यपदार्थांच्या अनुभवात महत्त्वपूर्ण बदल करण्याचा निर्णय घेतला आहे. संपूर्ण देशभरात रेल्वे प्रवास करताना स्थानिक पदार्थांचा आस्वाद घेता यावा यासाठी रेल्वे विभाग एक अभिनव पाऊल उचलत आहे. या निर्णयामुळे कोट्यवधी प्रवाशांच्या जेवणाच्या अनुभवात सकारात्मक बदल होणार आहे.
रेल्वे मंत्रालयाचे मोठे पाऊल-
भारतीय रेल्वे ही जगातील सर्वात मोठ्या रेल्वे जाळ्यांपैकी एक आहे. भारतातील लाखो नागरिक अजूनही प्रवासासाठी रेल्वेचाच पर्याय निवडतात. अनेकदा प्रवाशांच्या तक्रारी असतात की, रेल्वेमध्ये मिळणारे जेवण साचेबद्ध आणि स्वादहीन असते. मात्र आता रेल्वेमंत्री Ashwini Vaishnaw यांनी स्पष्टपणे सांगितले आहे की, प्रवाशांना त्यांच्या प्रवासादरम्यान त्या-त्या भागातील स्थानिक पदार्थ खायला मिळावेत, यासाठी प्रयत्न सुरू आहेत.
लोकसभेच्या प्रश्नोत्तर सत्रात DMK खासदार Sumathi T. यांनी दक्षिण भारतातून निघणाऱ्या गाड्यांमध्ये दाक्षिणात्य पदार्थ उपलब्ध करून देण्याची मागणी केली होती. यावर उत्तर देताना रेल्वे मंत्रालयाने सांगितले की, दक्षिण रेल्वेने स्थानिक पदार्थ देण्याचा प्रायोगिक उपक्रम सुरू केला आहे. याचा उद्देश असा आहे की, ट्रेन ज्या स्थानकातून पुढे सरकेल, त्या स्थानिकतेशी सुसंगत असलेले पदार्थ प्रवाशांना दिले जातील.
पारंपरिक खाद्यपदार्थ चाखता येणार-
हा उपक्रम संपूर्ण भारतभर लागू केला जाणार आहे. म्हणजेच तुम्ही काश्मीरहून कन्याकुमारीकडे प्रवास करत असाल, तर तुम्हाला प्रवासाच्या दरम्यान विविध प्रांतांचे स्थानिक आणि पारंपरिक खाद्यपदार्थ अनुभवता येणार आहेत. यामुळे प्रवाशांना नवा आणि चवदार अनुभव मिळेलच, शिवाय देशातील विविधतेतील एकतेचं अनोखं दर्शनही घडेल.
हा निर्णय केवळ खाद्यपदार्थांपुरता मर्यादित नाही, तर तो एक संस्कृतीचा आदानप्रदान घडवणारा महत्त्वाचा टप्पा ठरेल. विशेषतः ज्या प्रवाशांना त्यांच्या प्रादेशिक स्वादाची सवय आहे, त्यांच्यासाठी हा बदल अत्यंत स्वागतार्ह आहे. येत्या काही महिन्यांत देशभरात ही योजना टप्प्याटप्प्याने राबवली जाणार असून, या बदलामुळे रेल्वेप्रवास अधिक समृद्ध आणि आनंददायक होणार आहे.
