अकरावीच्या प्रवेशासाठी यंदा शालेय शिक्षण विभागाने ऑनलाइन पद्धतीचा अवलंब केला आहे. यानुसार, 21 मेपासून प्रवेश नोंदणी प्रक्रिया सुरू होणार होती. मात्र, तांत्रिक अडचणींमुळे प्रवेश पोर्टल क्रॅश झाल्याने ही प्रक्रिया लांबणीवर पडली. आता शिक्षण विभागाने सुधारित वेळापत्रक जाहीर करत 26 मेपासून नोंदणी प्रक्रिया सुरू होणार असल्याचे स्पष्ट केले आहे.
विद्यार्थ्यांना mahafyjcadmissions.in या संकेतस्थळावर नोंदणी करावी लागणार असून, यामुळे प्रवेश प्रक्रिया अधिक पारदर्शक आणि सुलभ होईल, अशी अपेक्षा आहे. नगर जिल्ह्यातील 61,412 उत्तीर्ण विद्यार्थ्यांसाठी 97,070 जागा उपलब्ध असल्याने कोणताही विद्यार्थी प्रवेशापासून वंचित राहणार नाही, अशी माहिती शिक्षण विभागाने दिली आहे.
प्रवेशासाठी नेमकं काय करावं?
शालेय शिक्षण विभागाने यंदा अकरावी प्रवेशासाठी संपूर्ण प्रक्रिया ऑनलाइन पद्धतीने राबविण्याचा निर्णय घेतला आहे. यासाठी विद्यार्थ्यांना प्रथम mahafyjcadmissions.in या संकेतस्थळावर लॉगिन आयडी तयार करून नोंदणी करावी लागेल. नोंदणीनंतर विद्यार्थ्यांना त्यांचे दहावीचे गुणपत्रक, शाळा सोडल्याचा दाखला आणि जातीचा दाखला (आवश्यक असल्यास) अपलोड करावा लागेल. यानंतर विद्यार्थी एका वेली कमाल 10 कॉलेजांची निवड करू शकतील. ही निवड पूर्ण झाल्यावर प्राथमिक गुणवत्ता यादी जाहीर होईल, त्यावर आक्षेप आणि दुरुस्ती केल्यानंतर अंतिम गुणवत्ता यादी प्रसिद्ध होईल. या यादीच्या आधारे विद्यार्थ्यांना प्रवेश दिले जातील. संकेतस्थळावर तांत्रिक अडचणी आल्याने 21 मे रोजी सुरू होणारी ही प्रक्रिया आता 26 मेपासून सुरू होणार आहे.
जिल्ह्यात अकरावीच्या प्रवेशासाठी एकूण 432 उच्च माध्यमिक विद्यालये
नगर जिल्ह्यात अकरावीच्या प्रवेशासाठी एकूण 432 उच्च माध्यमिक विद्यालये यू-डायस प्रणालीवर नोंदणीकृत आहेत. या शाळांमध्ये कला, वाणिज्य, विज्ञान, संयुक्त आणि व्होकेशनल विभागांसाठी मिळून 1,057 तुकड्या मंजूर आहेत. यामध्ये कला विभागासाठी 374, वाणिज्यसाठी 161, विज्ञानासाठी 484, संयुक्तसाठी 29 आणि व्होकेशनलसाठी 9 तुकड्या आहेत. या तुकड्यांमध्ये एकूण 97,070 जागा उपलब्ध आहेत. यंदा दहावीच्या परीक्षेत 61,412 विद्यार्थी उत्तीर्ण झाले असून, उपलब्ध जागांच्या तुलनेत विद्यार्थ्यांची संख्या कमी आहे. त्यामुळे प्रत्येक विद्यार्थ्याला प्रवेश मिळण्याची शक्यता आहे. ही प्रक्रिया पारदर्शकपणे राबविण्यासाठी शिक्षण विभागाने संकेतस्थळाच्या तांत्रिक सुधारणांवर विशेष लक्ष दिले आहे.
शिक्षण विभागाकडून सुधारित वेळापत्रक जाहीर
या ऑनलाइन प्रवेश प्रक्रियेमुळे विद्यार्थ्यांना आपल्या पसंतीच्या कॉलेजची निवड करणे सोयीचे होणार आहे. मात्र, संकेतस्थळावरील तांत्रिक अडचणींमुळे विद्यार्थी आणि पालकांमध्ये काही प्रमाणात नाराजी पसरली होती. शिक्षण विभागाने सुधारित वेळापत्रक जाहीर करत ही समस्या सोडवण्याचा प्रयत्न केला आहे. विद्यार्थ्यांना नोंदणी प्रक्रिया सुलभपणे पार पाडण्यासाठी शिक्षण विभागाने संकेतस्थळावर सविस्तर मार्गदर्शन उपलब्ध करून दिले आहे. यामुळे विद्यार्थ्यांना प्रवेश प्रक्रिया समजून घेणे आणि ती पूर्ण करणे सोपे जाईल. जिल्ह्यातील सर्व उत्तीर्ण विद्यार्थ्यांना प्रवेश मिळावा, यासाठी शिक्षण विभाग आणि स्थानिक प्रशासन यांचे एकत्रित प्रयत्न सुरू आहेत.
