Cooperative University : देशाच्या सहकार क्षेत्रात एक ऐतिहासिक पाऊल उचलण्यात आले असून, राज्यसभेत त्रिभुवन सहकारी विद्यापीठ स्थापनेसाठीचे विधेयक मंजूर झाले आहे. या विद्यापीठाच्या माध्यमातून देशभरातील राज्यांना त्यांच्या प्रादेशिक भाषांमध्ये सहकार शिक्षण दिले जाईल. विशेषतः सहकारी क्षेत्रातील भविष्यातील नेतृत्व घडवण्यासाठी हे विद्यापीठ महत्त्वपूर्ण भूमिका बजावेल, असे केंद्रीय सहकार राज्यमंत्री मुरलीधर मोहोळ (Murlidhar Mohol) यांनी सांगितले.
सहकारी विद्यापीठ स्थापनेसाठीचे विधेयक मंजूर
राज्यसभेत हे विधेयक आवाजी मतदानाने मंजूर करण्यात आले. विरोधकांनी केंद्र सरकारवर संघराज्य रचनेला कमकुवत करण्याचा आरोप केला, मात्र गृहमंत्री आणि सहकारमंत्री अमित शहा (Amit Shah) यांनी मोहोळ यांच्यावर हे विधेयक सुस्पष्टपणे मांडण्याची जबाबदारी सोपवली होती.
मोहोळ यांनी स्पष्ट केले की, त्रिभुवनदास पटेल (Tribhuvandas Patel) आणि सरदार वल्लभभाई पटेल (Sardar Vallabhbhai Patel) यांसारखे नेते काँग्रेसचे असले तरी, त्यांचे सहकार क्षेत्रातील योगदान अतुलनीय आहे. त्यांच्या कार्याचा सन्मान करणे हीच पंतप्रधान नरेंद्र मोदी (Narendra Modi) आणि अमित शहा यांच्या नेतृत्वाखालील भाजप सरकारची संस्कृती आहे.
गुजरातमध्ये राष्ट्रीय महत्त्वाची संस्था म्हणून होणार स्थापना
हे प्रस्तावित विद्यापीठ शिक्षण, प्रशिक्षण आणि संशोधनासाठी एक व्यापक आणि एकात्मिक व्यासपीठ निर्माण करेल. सहकारी संस्थांचे कर्मचारी आणि मंडळ सदस्य यांना आधुनिक व्यवस्थापन कौशल्ये आणि संशोधन सुविधा उपलब्ध करून देण्याचे उद्दिष्ट आहे.
गुजरातमधील ग्रामीण व्यवस्थापन संस्था आणंद (IRMA) ही त्रिभुवन सहकारी विद्यापीठ म्हणून श्रेणीसुधारित करण्याचा प्रस्ताव आहे. तसेच, या विद्यापीठाला राष्ट्रीय महत्त्वाची संस्था म्हणून घोषित करण्यात येणार आहे. IRMA ही एक स्वायत्त संस्था असून, ग्रामीण संस्थांच्या व्यावसायिक व्यवस्थापनात मोठे योगदान देत आहे.
दुग्ध सहकारी संस्थांमध्ये अमूल (Amul) चे संस्थापक वर्गीस कुरियन (Verghese Kurien) यांनी दिलेल्या योगदानामुळे ऑपरेशन फ्लड (Operation Flood) माध्यमातून भारताच्या दुग्ध उत्पादन क्षेत्रात क्रांती घडवली. त्यांच्या या विश्वासावरच IRMA ची स्थापना करण्यात आली.
गुजरातमध्ये हे सहकारी विद्यापीठ स्थापन झाल्याने भारताच्या सहकारी क्षेत्राला एक नव्या युगाची सुरुवात मिळेल. सहकार क्षेत्रातील प्रशिक्षित आणि उच्चशिक्षित नेतृत्व निर्माण करण्यासाठी ही मोठी संधी असेल.
