BEML Share Price:- आज शेअर बाजारात संरक्षण क्षेत्राशी संबंधित कंपन्यांच्या शेअर्सनी चांगली उसळी घेतली. विशेषतः बीईएमएल या मिनीरत्न कंपनीच्या शेअर्सनी ४४५० रुपयांपेक्षा अधिक दर गाठला आणि गुंतवणूकदारांचं लक्ष वेधून घेतलं. या तेजीमागे डीआरडीओसोबत झालेल्या महत्त्वपूर्ण करारांचा मोठा वाटा आहे. संरक्षण क्षेत्रात वाढती मागणी आणि लष्कराच्या गरजेनुसार होणारे नवीन करार हेही या उभारीमागचं कारण मानलं जातं.
बीईएमएलने डीआरडीओ सोबत केले परवाना करार
बीईएमएलने डीआरडीओच्या वाहन संशोधन आणि विकास प्रतिष्ठानसोबत (VRDE) तिन्ही महत्त्वाचे परवाना करार केले आहेत. या करारांतर्गत कंपनी लष्करासाठी अत्याधुनिक वाहने आणि समर्थन प्रणाली तयार करणार आहे. यात अर्जुन टँकसाठी युनिट मेंटेनन्स व्हेइकल्स (UMV), युनिट रिपेअर व्हेइकल्स (URV), आणि ७० टन वजनाचे टँक ट्रान्सपोर्ट करणारे ट्रेलर्स यांचा समावेश आहे. ही सगळी उत्पादने ‘मेक इन इंडिया’ उपक्रमाअंतर्गत देशातच विकसित केली जाणार आहेत.
बीईएमएलच्या शेअर्सची गेल्या काही महिन्यातील आकडेवारी
गेल्या काही महिन्यांतील आकडे पाहिले तर बीईएमएलच्या शेअर्समध्ये कमालीची वाढ झाली आहे. फक्त गेल्या एका महिन्यात कंपनीच्या शेअरने ३७ टक्क्यांची उडी घेतली आहे. तर तीन महिन्यांच्या कालावधीत ही वाढ ७० टक्क्यांहून अधिक आहे. पाच वर्षांतील एकंदर वाढ पाहिली तर बीईएमएलच्या शेअर्सनी जवळपास ७७५ टक्क्यांनी मूल्य वाढवले आहे. १२ जून २०२० रोजी ५०० रुपयांच्या आसपास असलेला शेअर आज ४४०० च्या घरात पोहोचला आहे. एवढंच नव्हे, तर गेल्या दोन वर्षांतही कंपनीने जवळपास १९५ टक्क्यांची परतफेड दिली आहे.
सध्या या शेअरची स्थिती काय?
सध्या BEML चा शेअर ५२ आठवड्यांच्या उच्चांकी पातळीच्या म्हणजेच ५४८९ रुपयांच्या आसपास पोहोचण्याच्या मार्गावर आहे. तर या काळातली नीचांकी पातळी २३४६ रुपयांपर्यंत खाली गेली होती. म्हणजेच या शेअरमध्ये मोठ्या प्रमाणावर चढ-उतार दिसून आले, पण सध्याची घडी पाहता त्यात स्थैर्य आणि संभाव्यता दिसून येत आहे.
फक्त बीईएमएलच नव्हे, तर संपूर्ण संरक्षण क्षेत्रच सध्या बाजारात उत्साही मूडमध्ये आहे. भारत इलेक्ट्रॉनिक्स (BEL), भारत डायनॅमिक्स (BDL), डेटा पॅटर्न्स, पारस डिफेन्स अशा इतर कंपन्यांच्याही शेअर्सनी चांगली कामगिरी केली. यामागे एक प्रमुख कारण म्हणजे लष्कराच्या ३०,००० कोटी रुपयांच्या क्यूआरएसएएम (QRSAM) म्हणजेच क्विक रिअ‍ॅक्शन सरफेस-टू-एअर मिसाईल खरेदीची शक्यता. ही मागणी जाहीर झाल्यानंतर संरक्षण कंपन्यांच्या शेअर्समध्ये चैतन्य निर्माण झालं.
