EPFO News : कर्मचारी भविष्य निर्वाह निधी संघटना (ईपीएफओ) आपल्या कोट्यवधी सदस्यांसाठी मोठी डिजिटल सुविधा आणण्याच्या तयारीत आहे.
लवकरच सदस्यांना यूपीआयद्वारे थेट पीएफचे पैसे काढता येणार असून यासाठी स्वतंत्र मोबाइल अॅप मार्च-एप्रिल 2026 दरम्यान लाँच होण्याची शक्यता आहे. सध्या या अॅपची चाचणी सुरू असून तांत्रिक त्रुटी दूर करण्याचे काम अंतिम टप्प्यात आहे.
हे नवीन अॅप सध्याच्या उमंग अॅपपेक्षा वेगळे असेल. अॅप सदस्यांच्या बँक खात्याशी जोडले जाईल तसेच भीम आणि इतर यूपीआय अॅप्सशीही एकत्रित केले जाईल.
त्यामुळे सदस्यांना त्यांच्या पात्र ईपीएफ शिल्लक रकमेची माहिती अॅपमध्ये पाहता येईल आणि यूपीआय पिनद्वारे व्यवहार पूर्ण करून रक्कम थेट त्यांच्या सीडेड बँक खात्यात जमा करता येईल. पासबुक बॅलन्स तपासणे, व्यवहार स्थिती पाहणे यांसारख्या सुविधा देखील अॅपमध्ये उपलब्ध असतील.
ईपीएफओ सध्या सुमारे 100 डमी खात्यांच्या माध्यमातून या प्रणालीची चाचणी घेत आहे. कामगार मंत्रालय या प्रकल्पावर लक्ष ठेवून आहे. ईपीएफओच्या वरिष्ठ अधिकाऱ्यांनी दिलेल्या माहितीनुसार, ईपीएफमधील काही रक्कम नियमानुसार गोठवलेली राहील, तर मोठा भाग यूपीआयद्वारे काढता येईल.
सध्या पीएफ काढण्यासाठी सदस्यांना यूएएन पोर्टल किंवा उमंग अॅपद्वारे ऑनलाइन दावा दाखल करावा लागतो. ही प्रक्रिया पूर्ण होण्यासाठी काही दिवसांचा कालावधी लागतो.
दरवर्षी 5 कोटींहून अधिक दावे निकाली काढले जातात. कोविड काळात ऑटो-सेटलमेंटच्या माध्यमातून 3 दिवसांत दावे निकाली काढण्याची सुविधा देण्यात आली होती आणि मर्यादा 1 लाखांवरून 5 लाखांपर्यंत वाढवण्यात आली. मात्र, बँकिंग परवान्याअभावी ईपीएफओला थेट पैसे काढण्याची सुविधा देता येत नव्हती.
सुमारे 8 कोटी सदस्य असलेल्या ईपीएफओकडून डिजिटल सेवांमध्ये सातत्याने सुधारणा केल्या जात आहेत. ईपीएफओ 3.0 अपग्रेड अंतर्गत जलद पडताळणी आणि डिजिटल दावा प्रक्रिया अधिक सुलभ करण्याचा प्रयत्न आहे.
यूपीआय एकत्रीकरणामुळे पीएफ काढण्याची प्रक्रिया अधिक जलद, सोपी आणि पारदर्शक होणार असून सदस्यांना आजारपण, शिक्षण, लग्न किंवा घरखरेदीसारख्या गरजांसाठी तात्काळ आर्थिक मदत मिळू शकणार आहे.
