Family Floater Plan:- आजच्या काळात वैद्यकीय खर्च झपाट्याने वाढत आहेत आणि कोणत्याही वयातील व्यक्तीला आरोग्याशी संबंधित संकटाचा सामना करावा लागू शकतो. अशा वेळी मोठ्या हॉस्पिटल खर्चाचा आर्थिक भार कमी करण्यासाठी आरोग्य विमा आवश्यक ठरतो.
परंतु प्रत्येक कुटुंब सदस्यासाठी स्वतंत्र विमा योजना घेणे महागडे आणि आर्थिक दृष्ट्या मॅनेज करायला कठीण होऊ शकते. यावर फॅमिली फ्लोटर प्लॅन हा एक प्रभावी पर्याय ठरतो, कारण तो संपूर्ण कुटुंबाला एका पॉलिसीखाली आणि एकाच प्रीमियममध्ये कव्हर करतो.
फॅमिली फ्लोटर प्लॅन म्हणजे काय?
फॅमिली फ्लोटर प्लॅन म्हणजे एक अशी आरोग्य विमा योजना आहे जिथे कुटुंबातील सर्व सदस्यांना एकाच विमा पॉलिसीअंतर्गत कव्हर मिळते. यामध्ये ठराविक विमा रक्कम असते जी कुटुंबातील कोणत्याही सदस्यासाठी वापरता येते. उदाहरणार्थ, जर कुटुंबात चार सदस्य असतील आणि प्रत्येकासाठी स्वतंत्र २ लाख रुपयांची वैयक्तिक विमा योजना घेतली तर त्या सदस्याला फक्त २ लाख रुपयांपर्यंतच कव्हर मिळेल.
मात्र, जर ८ लाख रुपयांचा फॅमिली फ्लोटर प्लॅन घेतला तर त्या रकमेचा लाभ कुटुंबातील कोणत्याही सदस्याला मिळू शकतो. याचा फायदा असा होतो की, जर एखाद्या सदस्याला मोठा वैद्यकीय खर्च करावा लागला तर संपूर्ण विमा रक्कम त्याच्या उपचारासाठी वापरता येऊ शकते आणि उर्वरित रक्कम अन्य सदस्यांसाठी राखून ठेवली जाऊ शकते.
फॅमिली फ्लोटर प्लॅनचे फायदे
एकाच प्रीमियममध्ये संपूर्ण कुटुंबाचे संरक्षण
फॅमिली फ्लोटर प्लॅन घेतल्यास संपूर्ण कुटुंबाला कव्हर करण्यासाठी एकाच पॉलिसीचा लाभ घेता येतो. ही योजना वेगळ्या आरोग्य विमा पॉलिसींपेक्षा स्वस्त असते, कारण यामध्ये केवळ एकाच प्रीमियमद्वारे सर्व सदस्यांचे संरक्षण होते. त्यामुळे, प्रत्येकासाठी स्वतंत्र विमा घेण्याची गरज पडत नाही आणि आर्थिकदृष्ट्या बचतही होते.
लवचिक आणि सोयीस्कर योजना
या योजनेत कोणताही सदस्य आजारी पडल्यास विम्याच्या एकूण रकमेतून त्याच्यासाठी खर्च केला जाऊ शकतो. म्हणजेच जर ८ लाख रुपयांचा प्लॅन घेतला असेल आणि एखाद्या सदस्यासाठी ५ लाख रुपये खर्च झाले.तर उर्वरित ३ लाख रुपये इतर सदस्यांसाठी वापरले जाऊ शकतात.
मोठ्या कुटुंबांसाठी योग्य पर्याय
काही विमा कंपन्या केवळ पती, पत्नी आणि मुलांनाच कव्हर करतात.तर काही कंपन्या पालक, सासू-सासरे आणि भावंडांनाही समाविष्ट करण्याचा पर्याय देतात. काही योजनेत १५ लोकांपर्यंत संरक्षण दिले जाते. त्यामुळे मोठ्या कुटुंबांसाठीही हा उत्तम पर्याय ठरतो.
पूर्वीच्या आजारांसाठी संरक्षण
अनेक विमा कंपन्या पालकांच्या पूर्वीच्या आजारांनाही कव्हर करतात.परंतु त्यासाठी जास्त प्रीमियम भरावा लागू शकतो. जर तुमच्या कुटुंबातील एखाद्या सदस्याला आधीपासून मधुमेह, हृदयरोग किंवा इतर गंभीर आजार असतील तर काही फ्लोटर प्लॅन त्या आजारांना देखील कव्हर करतात.
वेगवेगळ्या पॉलिसींच्या झंझटीतून मुक्तता
फॅमिली फ्लोटर प्लॅनचा आणखी एक मोठा फायदा म्हणजे वेगवेगळ्या पॉलिसी घेण्याची आणि त्यांच्या नोंदी ठेवण्याची गरज भासत नाही. एकाच पॉलिसीमध्ये संपूर्ण कुटुंबाचा समावेश होत असल्याने विमा व्यवस्थापन अधिक सोपे होते.
अॅड-ऑन सुविधा आणि अतिरिक्त संरक्षण
काही विमा कंपन्या गंभीर आजारांसाठी अॅड-ऑन कव्हर देतात. ज्यामुळे मोठ्या वैद्यकीय खर्चापासून कुटुंबाचे संरक्षण होते. यामध्ये कॅन्सर, हार्ट अटॅक, किडनी फेल्युअर यासारख्या गंभीर आजारांसाठी अतिरिक्त संरक्षण मिळते.
फॅमिली फ्लोटर प्लॅन घेण्यापूर्वी काय लक्षात ठेवावे?
विमा रक्कम योग्य प्रकारे ठरवा
कुटुंबाच्या आरोग्यविषयक गरजा विचारात घेऊन विमा रक्कम ठरवावी. जर कुटुंब मोठे असेल आणि काही सदस्यांना पूर्वीपासून आजार असतील तर मोठ्या कव्हरची निवड करावी.
विमा कंपन्यांची तुलना करा
विविध विमा कंपन्यांचे फ्लोटर प्लॅनची तुलना करून कोणत्या योजनेत अधिक फायदे मिळत आहेत हे तपासा. काही कंपन्या अधिक फायदेशीर अटी देऊ शकतात.
पूर्वीच्या आजारांसाठी प्रतीक्षा कालावधी
अनेक विमा योजनांमध्ये पूर्वीच्या आजारांसाठी प्रतीक्षा कालावधी असतो. याचा अर्थ काही वर्षांनंतरच त्याचा फायदा मिळतो. त्यामुळे हा कालावधी किती आहे ते तपासणे महत्त्वाचे आहे.
कॅशलेस हॉस्पिटल नेटवर्क तपासा
विमा कंपनीच्या पॉलिसीअंतर्गत कोणत्या रुग्णालयांमध्ये कॅशलेस उपचारांची सुविधा आहे हे तपासणे आवश्यक आहे.
फॅमिली फ्लोटर प्लॅन का घ्यावा?
जर तुम्हाला संपूर्ण कुटुंबासाठी एकाच योजनेत व्यापक आरोग्य संरक्षण हवे असेल आणि प्रत्येकासाठी वेगळ्या पॉलिसी घेण्याचा व व्यवस्थापित करण्याचा त्रास टाळायचा असेल तर फॅमिली फ्लोटर प्लॅन हा सर्वोत्तम पर्याय ठरतो.
हा पर्याय खर्चिक असूनही फायदेशीर आहे. कारण यामध्ये सर्व सदस्यांसाठी एकत्रित आरोग्य संरक्षण मिळते. वाढत्या वैद्यकीय खर्चाच्या पार्श्वभूमीवर हा एक शहाणपणाचा आणि किफायतशीर निर्णय असू शकतो.
फॅमिली फ्लोटर प्लान फॅमिलीसाठी महत्वाचा
फॅमिली फ्लोटर प्लॅन हा एकाच पॉलिसीमध्ये संपूर्ण कुटुंबासाठी संरक्षण देणारा प्रभावी आणि किफायतशीर विमा पर्याय आहे. या योजनेत कमी प्रीमियममध्ये अधिक संरक्षण मिळते. तसेच संपूर्ण विमा रक्कम कोणत्याही सदस्यासाठी वापरता येते.
पूर्वीच्या आजारांचे कव्हर, मोठ्या कुटुंबासाठी उपलब्धता, तसेच अॅड-ऑन फायदे यामुळे हा प्लॅन अधिक उपयुक्त ठरतो. जर तुम्हाला आपल्या कुटुंबासाठी एकाच ठिकाणी आणि सोयीस्कर विमा योजना हवी असेल, तर फॅमिली फ्लोटर प्लॅन हा उत्तम पर्याय आहे.
