FD Interest Rate 2025:- भारतीय रिझर्व्ह बँक 7 फेब्रुवारी रोजी होणाऱ्या चलनविषयक धोरण समितीच्या बैठकीत रेपो दर कपातीचा निर्णय घेण्याची शक्यता आहे. या संभाव्य बदलाच्या पार्श्वभूमीवर, युनियन बँक ऑफ इंडिया, पंजाब नॅशनल बँक (PNB), अ‍ॅक्सिस बँक, शिवालिक स्मॉल फायनान्स बँक, कर्नाटक बँक आणि फेडरल बँकेने त्यांच्या मुदत ठेवींवरील व्याजदरांमध्ये सुधारणा केली आहे. हे बदल जानेवारी 2025 पासून लागू झाले असून सुरक्षित गुंतवणुकीच्या शोधात असलेल्या ग्राहकांसाठी ही महत्त्वाची संधी असू शकते.
युनियन बँकेचे सुधारित व्याजदर
युनियन बँक ऑफ इंडियाने आपल्या FD व्याजदरांमध्ये बदल करून सामान्य नागरिकांसाठी 7 दिवसांपासून 10 वर्षांपर्यंतच्या मुदतीसाठी 3% ते 7.30% दरम्यान व्याजदर निश्चित केला आहे. विशेषतः, 456 दिवसांच्या मुदतीसाठी गुंतवणूक करणाऱ्या ग्राहकांना 7.30% हा कमाल व्याजदर मिळेल. हा नवीन व्याजदर 1 जानेवारीपासून लागू झाला आहे.
ॲक्सिस बँकेचे व्याजदर
अ‍ॅक्सिस बँकेने देखील आपल्या FD व्याजदरात सुधारणा करून ते 3% ते 7.25% पर्यंत निश्चित केले असून हे नवीन दर 27 जानेवारीपासून लागू झाले आहेत.
फेडरल बँकेचे व्याजदर
फेडरल बँकेने सामान्य नागरिकांसाठी 7 दिवसांपासून 10 वर्षांपर्यंतच्या मुदतीसाठी 3% ते 7.50% पर्यंत व्याजदर लागू केला आहे. 444 दिवसांच्या FD साठी ग्राहकांना 7.50% व्याजदर मिळेल. हा सुधारित व्याजदर 10 जानेवारीपासून लागू करण्यात आला आहे.
कर्नाटक बँकेचे व्याजदर
कर्नाटक बँकेने 7 दिवसांपासून 10 वर्षांपर्यंतच्या मुदतीसाठी FD वर 3.50% ते 7.50% पर्यंत व्याजदर निश्चित केला आहे.तर 375 दिवसांच्या मुदतीसाठी कमाल 7.50% व्याजदर उपलब्ध आहे. हे बदल 2 जानेवारीपासून लागू झाले आहेत.
शिवालिक स्मॉल बँकेचे व्याजदर
शिवालिक स्मॉल फायनान्स बँकेने आपल्या FD व्याजदरांमध्ये मोठा बदल करत सामान्य नागरिकांसाठी 3.50% ते 8.80% आणि ज्येष्ठ नागरिकांसाठी 4% ते 9.30% पर्यंत व्याजदर निश्चित केला आहे. हे सुधारित दर 22 जानेवारीपासून लागू झाले आहेत.
पंजाब नॅशनल बँकेचे व्याजदर
पंजाब नॅशनल बँकेने आपल्या ग्राहकांसाठी 303 दिवसांच्या नवीन FD मुदतीसाठी 7% व्याजदर लागू केला आहे. तर 506 दिवसांसाठी 6.7% आणि 400 दिवसांसाठी 7.25% व्याजदर निश्चित केला आहे. 7 दिवसांपासून 10 वर्षांपर्यंतच्या FD साठी हा व्याजदर 3.50% ते 7.25% दरम्यान राहील. हे बदल 1 जानेवारीपासून लागू झाले आहेत.
गुंतवणूकदारांसाठी महत्त्वाची संधी
RBI च्या संभाव्य रेपो दर कपातीपूर्वी अनेक बँकांनी त्यांच्या FD दरांमध्ये बदल केले आहेत. जर तुम्ही सुरक्षित गुंतवणुकीच्या शोधात असाल तर शिवालिक स्मॉल फायनान्स बँक (8.80%),
फेडरल बँक (7.50%) आणि PNB (7.25%) यांचे FD प्लॅन्स आकर्षक ठरू शकतात. योग्य मुदत योजना निवडून चांगल्या परताव्यासाठी गुंतवणूक करण्याचा हा उत्तम काळ आहे. तुमच्या गरजेनुसार योग्य FD योजना निवडून सुरक्षित गुंतवणुकीचा लाभ घेणे महत्त्वाचे आहे.
