Fixed Deposit Schemes : देशातील 4 मोठ्या बँकांनी सप्टेंबर महिन्यात मुदत ठेव योजनांच्या व्याजदरात वाढ केली आहे, त्यामुळे गुंतवणूकदारांना अधिक नफा कमविण्याची संधी मिळाली आहे. त्याचबरोबर नवीन गुंतवणूकदारही एफडी योजनांमध्ये गुंतवणूक करण्यासाठी आकर्षित झाले आहेत. तुम्ही देखील तुमच्यासाठी उत्तम गुंतवणूक योजना शोधत असाल तर ही संधी तुमच्यासाठी चांगली ठरू शकते.
दरम्यान, 4-6 ऑक्टोबर रोजी रिझर्व्ह बँक ऑफ इंडिया (RBI) च्या आगामी चलनविषयक धोरण समिती (MPC) बैठकीवरही गुंतवणूकदार आणि बँका लक्ष ठेवून आहेत. आरबीआयने रेपो दरात सुधारणा केल्यास गुंतवणूकदारांना आणखी लाभ मिळण्याची शक्यता आहे. आरबीआयने गेल्या तीन बैठकीमध्ये दर बदललेले नाहीत.
‘या’ बँका एफडीवर देत आहेत उत्तम व्याजदर
IDBI बँक
IDBI बँक नागरिकांना 7 दिवस ते 10 वर्षांच्या मुदत ठेव योजनांमध्ये गुंतवणूक करण्याची संधी देते. या कालावधीत, बँकेने सर्वसामान्य नागरिकांसाठी 3% ते 6.80% पर्यंत व्याजदर देण्याची घोषणा केली आहे. तर, ज्येष्ठ नागरिकांसाठी व्याजदर 3.50% ते 7.30% पर्यंत असेल. बँकेने नवीन व्याजदर 15 सप्टेंबर 2023 पासून लागू केले आहेत.
अ‍ॅक्सिस बँक
अ‍ॅक्सिस बँकेने 2 कोटी रुपयांपेक्षा कमी गुंतवणुकीसाठी निवडक मुदत ठेव योजनांचे व्याजदर 50 बेस पॉइंट्सने (bps) कमी केले आहेत. त्याच वेळी, अ‍ॅक्सिस बँकेने 46 दिवसांच्या कालावधीसह 60 दिवसांच्या FD वर व्याजदर देखील वाढवला आहे. बँकेच्या म्हणण्यानुसार, या कालावधीतील व्याजदर 25 bps ने 4% वरून 4.25% पर्यंत वाढवला आहे. त्यामुळे 46-60 दिवसांचा कालावधी असलेल्या गुंतवणूकदारांना फायदा होईल. FD वर नवीन व्याजदर 15 सप्टेंबर 2023 पासून लागू होईल.
कोटक महिंद्रा बँक
कोटक महिंद्रा बँकेने 2 कोटी रुपयांपेक्षा कमी गुंतवणूक असलेल्या मुदत ठेव योजनांवरील व्याजदरांमध्ये सुधारणा केली आहे. सुधारित व्याजदर 13 सप्टेंबर 2023 पासून लागू करण्यात आले आहेत. कोटक महिंद्रा बँक सामान्य नागरिकांना 2.75% ते 7.25% आणि ज्येष्ठ नागरिकांना 3.25% ते 7.75% दरम्यान व्याजदर देत आहे. बँकेने 23 महिन्यांच्या कालावधीसाठी सर्वसामान्य नागरिकांसाठी व्याजदर 7.20% वरून 7.25% पर्यंत 25 bps ने वाढवला आहे.
येस बँक
येस बँकेने ठराविक कालावधीसाठी 2 कोटी रुपयांपेक्षा कमी गुंतवणूक असलेल्या मुदत ठेव योजनांसाठी व्याजदर सुधारित केले आहेत. बँकेच्या म्हणण्यानुसार, सामान्य नागरिकांना 3.25% ते 7.75% पर्यंत व्याज दिले जात आहे. येस बँकेच्या वेबसाइटनुसार, बँक ज्येष्ठ नागरिकांसाठी 3.75% ते 8.25% पर्यंत व्याज देते. सुधारित एफडी दर 4 सप्टेंबर 2023 पासून लागू झाले आहेत.
