HDFC Bank News : एचडीएफसी बँकेनं आपल्या ग्राहकांसाठी दिलासादायक निर्णय घेत निवडक कालावधीसाठी एमसीएलआर (MCLR – Marginal Cost of Funds Based Lending Rate) मध्ये कपात केली आहे.
बँकेनं तीन वर्षांच्या कालावधीसाठीचा एमसीएलआर ५ बेसिस पॉइंट्स म्हणजेच ०.०५ टक्क्यांनी कमी केला असून, हा दर आता ८.६० टक्के झाला आहे. याआधी हा दर ८.६५ टक्के होता. विशेष म्हणजे, इतर कोणत्याही कालावधीतील एमसीएलआर दरांमध्ये बँकेनं बदल केलेला नाही.
नवीन दर ७ फेब्रुवारी २०२६ पासून लागू झाले असून, बँकेच्या फंडिंग कॉस्ट आणि लिक्विडिटीच्या स्थितीचा विचार करून हा निर्णय घेण्यात आला आहे.
रिझर्व्ह बँक ऑफ इंडियानं (RBI) नुकत्याच झालेल्या पतधोरण बैठकीत रेपो रेटमध्ये कोणताही बदल केलेला नसतानाही, एचडीएफसी बँकेनं आपल्या स्तरावर व्याजदरांमध्ये संतुलन राखण्यासाठी ही कपात केली आहे.
सध्या ओव्हरनाईट आणि एका महिन्याचा एमसीएलआर ८.२५ टक्क्यांवर कायम आहे. तीन महिन्यांचा एमसीएलआर ८.३० टक्के असून, सहा महिने आणि एक वर्षाचा एमसीएलआर ८.४० टक्के आहे.
दोन वर्षांचा एमसीएलआर ८.५० टक्क्यांवर स्थिर ठेवण्यात आला आहे. त्यामुळे तीन वर्षांच्या कालावधीशी लिंक असलेल्या कर्जदारांनाच या कपातीचा थेट फायदा होणार आहे.
एमसीएलआरमध्ये झालेल्या कपातीमुळे होम लोन, पर्सनल लोन किंवा बिझनेस लोन घेणाऱ्या ग्राहकांचा व्याजदर किंचित कमी होऊ शकतो. परिणामी, ईएमआयमध्येही थोडीशी घट होण्याची शक्यता आहे.
जरी ही कपात फार मोठी नसली, तरी दीर्घकालीन कर्जाच्या बाबतीत एकूण बचत लक्षणीय ठरू शकते. मात्र, हा फायदा कर्जाच्या ‘रीसेट सायकल’नुसार पुढील रीसेट तारखेला लागू होईल.
तज्ज्ञांच्या मते, गेल्या काही महिन्यांत अनेक खासगी आणि सार्वजनिक क्षेत्रातील बँकांनी एमसीएलआर दरांमध्ये बदल केले असून, कर्जदारांसाठी हे सकारात्मक वातावरण आहे.
मात्र, हे लक्षात घेणं महत्त्वाचं आहे की फक्त फ्लोटिंग रेट आणि एमसीएलआरशी जोडलेल्या कर्जांनाच या कपातीचा फायदा होईल. फिक्स्ड रेट कर्जदारांच्या ईएमआयमध्ये कोणताही बदल होणार नाही. त्यामुळे कर्जाशी संबंधित निर्णय घेताना ग्राहकांनी बँकेकडून संपूर्ण माहिती घेणं आवश्यक आहे.
