CIBIL स्कोर हा तुमच्या आर्थिक शिस्तीचा आरसा आहे. कोणत्याही प्रकारचे कर्ज – मग ते गृहकर्ज, वाहन कर्ज किंवा वैयक्तिक कर्ज असो, बँका आणि वित्तीय संस्थांकडून मंजूर होण्याआधी तुमच्या CIBIL स्कोरची तपासणी केली जाते. जर तुमचा स्कोर उच्च असेल, तर तुम्हाला कर्ज सहज आणि कमी व्याजदरात मिळते. मात्र, जर CIBIL स्कोर खराब असेल, तर कर्ज मिळणे कठीण होते किंवा जास्त व्याजदर भरावा लागू शकतो. म्हणूनच, CIBIL स्कोर चांगला ठेवणे अत्यंत महत्त्वाचे आहे.
CIBIL स्कोर खराब होण्याची कारणे कोणती?
CIBIL स्कोर खराब होण्यामागे अनेक कारणे असतात. सर्वात मोठे कारण म्हणजे कर्ज किंवा क्रेडिट कार्डचे बिल वेळेवर न भरणे. कर्जाची वेळेवर परतफेड न केल्याने तुमचा क्रेडिट इतिहास नकारात्मक होतो.
क्रेडिट कार्डवर जास्त खर्च करणे आणि त्याच्या क्रेडिट युटिलायझेशन रेशोचा योग्य वापर न करणे हे देखील स्कोर कमी होण्यास कारणीभूत ठरू शकते. याशिवाय, जर तुम्ही कोणाच्या कर्जाचे जामीनदार असाल आणि त्या व्यक्तीने पैसे वेळेवर भरले नाहीत, तर त्याचा परिणाम तुमच्या CIBIL स्कोरवर होतो.
CIBIL स्कोर सुधारण्यास किती वेळ लागतो?
जर तुमचा CIBIL स्कोर खराब झाला असेल आणि तुम्हाला तो सुधारायचा असेल, तर हे समजून घ्या की हा एक दिवसात सुधारला जाणारा घटक नाही. क्रेडिट स्कोअर सुधारण्यासाठी सहसा 6 महिने ते 1 वर्षाचा कालावधी लागू शकतो.
स्कोअर जास्तच कमी असेल, तर तो सुधारण्यासाठी अधिक वेळ लागू शकतो. त्यामुळे तुमचा स्कोअर कायम चांगला राहील, याची काळजी घेणे महत्त्वाचे आहे. तुमचा क्रेडिट स्कोअर वेळोवेळी तपासून तुम्ही योग्य पावले उचलली, तर तो हळूहळू सुधारता येतो.
CIBIL स्कोर सुधारण्यासाठी आवश्यक उपाय
जर तुम्हाला तुमचा CIBIL स्कोर सुधारायचा असेल, तर काही मूलभूत आर्थिक शिस्त पाळणे गरजेचे आहे. सर्वप्रथम, जर तुम्ही कर्ज घेतले असेल तर त्याच्या EMI ची वेळेवर परतफेड करा.
क्रेडिट कार्ड वापरताना त्याच्या मर्यादेच्या 30 टक्क्यांपेक्षा जास्त खर्च करू नका आणि त्याची बिले वेळेवर भरा. वारंवार असुरक्षित कर्ज घेणे टाळा आणि कर्जाची पुर्तता झाली असल्यास ती शक्य तितक्या लवकर संपवा.
जर तुमच्याकडे आधीपासून कोणताही क्रेडिट इतिहास नसेल, तर लहान रकमेचे कर्ज घेऊन त्याची वेळेवर परतफेड करणे फायदेशीर ठरू शकते. यामुळे तुमचा सकारात्मक क्रेडिट इतिहास तयार होईल आणि भविष्यात मोठे कर्ज घेताना सोपे जाईल. तसेच, कोणाच्याही कर्जासाठी जामीनदार होण्याचा निर्णय घेताना काळजी घ्या,
कारण याचा परिणाम थेट तुमच्या CIBIL स्कोरवर होऊ शकतो. CIBIL स्कोर सुधारण्यासाठी संयम आणि सातत्य आवश्यक आहे. तुम्ही योग्य पद्धतीने आर्थिक नियोजन केल्यास आणि वेळेवर कर्ज परतफेड केली, तर तुमचा स्कोअर हळूहळू सुधारेल आणि तुम्हाला भविष्यातील आर्थिक व्यवहारात मोठा फायदा होईल.
