Stock Market Crash:- आज सोमवारच्या सकाळी शेअर बाजारात जे काही घडलं, त्याने अनेक गुंतवणूकदारांची झोप उडवली. बाजार उघडताच सेन्सेक्स आणि निफ्टी दोन्ही मोठ्या घसरणीसह सुरुवात झाली. अवघ्या १५ मिनिटांत गुंतवणूकदारांचे जवळपास तीन लाख कोटी रुपयांचे नुकसान झाले. ही घसरण केवळ आकड्यांपुरती मर्यादित नाही, तर तिच्यामागे अनेक जागतिक कारणांची मालिकाच आहे.
मुंबई शेअर बाजारातील सेन्सेक्स तब्बल ९०० अंकांनी घसरून ८१,४८८ च्या पातळीवर पोहोचला, तर निफ्टी ५० २४,८५० च्या खाली आला. याचा अर्थ, बाजाराने मागील सत्राच्या तुलनेत सुमारे १ टक्क्यांहून अधिक घसरण अनुभवली. केवळ मोठ्या कंपन्याच नव्हे तर मध्यम आणि लहान कंपन्यांचे शेअर्सही दबावात होते. बीएसई मिडकॅप आणि स्मॉलकॅप निर्देशांक जवळपास १% घसरले. यातून स्पष्ट होतं की संपूर्ण बाजारावरच नकारात्मक भावनेचा प्रभाव आहे.
या घसरणीचं प्रमुख कारण काय?
या घसरणीचं प्रमुख कारण म्हणजे जागतिक पातळीवर वाढलेलं राजकीय तणावाचं सावट. इस्रायल आणि इराणमधील संघर्ष नवीन टप्प्यावर पोहोचला आहे. शनिवारी अमेरिकेने इराणमधील तीन अणुस्थळांवर हल्ला केल्याची बातमी आली आणि त्यामुळे बाजाराचं मन विचलित झालं. मध्य पूर्वेतील ही अस्थिरता तात्पुरती नाही, हे आता स्पष्ट होतंय. इराणचा प्रत्युत्तर कसा असेल, हे पाहणं महत्त्वाचं ठरणार आहे. अशा प्रसंगी कोणताही अंदाज बांधणं कठीण असतं आणि त्यामुळेच बाजार गोंधळलेल्या मनःस्थितीत दिसतोय.
या सगळ्या पार्श्वभूमीवर इराणने होर्मुझच्या सामुद्रधुनीबाबत दिलेली सूचनाही चिंता वाढवणारी आहे. ही सामुद्रधुनी म्हणजे जगाच्या ऊर्जा पुरवठ्याचा एक अतिशय महत्त्वाचा मार्ग. जर इराणने हा मार्ग बंद करण्याचा निर्णय घेतला, तर तेलाचा पुरवठा थांबण्याची भीती निर्माण होईल. या भीतीचा परिणाम बाजारात आधीच जाणवतोय. जागतिक कच्च्या तेलाच्या किमती वाढून आता प्रति बॅरल ७९ डॉलरच्या आसपास पोहोचल्या आहेत. आणि यामुळे भारतासारख्या तेल आयात करणाऱ्या देशांची अडचण वाढू शकते.
तेल महाग झालं की अनेक गोष्टी महाग होतात. वाहतूक, उत्पादन, रोजच्या जीवनात लागणाऱ्या वस्तूंचे दर. याचा थेट परिणाम महागाईवर होतो आणि त्यामुळे ग्राहक आणि कंपन्या दोघांच्याही खिशाला कात्री लागते. त्यात भर म्हणून रुपयातही कमजोरी दिसून आली. डॉलरच्या तुलनेत रुपया १७ पैशांनी घसरून ८६.७२ वर गेला. एकूणच, तेलाच्या किमती आणि रुपयातील घसरण हे दोन्ही घटक गुंतवणुकीसाठी पोषक वातावरण तयार करत नाहीत.
या पार्श्वभूमीवर, गुंतवणूकदारांनी काय करावं, हा सध्या सर्वात महत्त्वाचा प्रश्न आहे. तज्ज्ञांचा सल्ला स्पष्ट आहे की घाबरून विक्री करू नका. अस्थिरता कायम राहील, पण अशा काळातच संयम ठेवून दीर्घकालीन दृष्टीकोन ठेवणं गरजेचं आहे. विशेषतः तेलाशी संबंधित कंपन्यांचे शेअर्स काही काळ दबावात राहतील व त्यामुळे त्यांच्यावर नजर ठेवणं गरजेचं आहे. पण, अशा घडामोडी हळूहळू शांत झाल्यावर बाजारात सुधारणा होण्याची शक्यता देखील असते.
