शेअर बाजारात मोठी गुंतवणूक करण्यासाठी खूप पैसे लागतात, अशी एक सर्वसामान्य समजूत आहे. पण खरं सांगायचं झालं, तर काही स्टॉक्स असे असतात जे अगदी १०० रुपयांच्या खाली मिळतात आणि तरीही त्यांचं मूल्य मोठं असतं. थोडक्यात सांगायचं तर, किंमत आणि मूल्य ही दोन वेगळी गोष्टी आहेत स्वस्त स्टॉक म्हणजे वाईट स्टॉक असं समीकरण अजिबातच लागू होत नाही. सध्या बाजारात दोन असे स्टॉक्स चर्चेत आहेत, जे १०० रुपयांपेक्षा स्वस्त आहेत, पण ब्रोकरेज हाऊसच्या मते त्यांच्यात २२% ते ५८% पर्यंत परतावा देण्याची क्षमता आहे.
या यादीत पहिलं नाव आहे सुझलॉन एनर्जीचं. पर्यावरणपूरक ऊर्जा क्षेत्रात काम करणाऱ्या या कंपनीने गेल्या काही वर्षांत पुनरुज्जीवनाचं उत्तम उदाहरण दिलं आहे. सध्या कंपनीचा शेअर जवळपास ६८ रुपयांवर मिळतो आहे. पण ब्रोकरेज हाऊस मोतीलाल ओसवालने यासाठी ८३ रुपयांची आणि जेएम फायनान्शियलने ८१ रुपयांची लक्ष्य किंमत निश्चित केली आहे. म्हणजे सध्याच्या भावावरून जवळपास २२% परतावा मिळू शकतो, असं त्यांचं मत आहे. विशेष म्हणजे, कंपनीचा एका वर्षाचा उच्चांक ८६ रुपये होता, त्यामुळे सध्या २१% सवलतीत तो स्टॉक मिळतो आहे.
सुझलॉनच्या कामगिरीकडे पाहिलं, तर कंपनीकडे मे २०२५ पर्यंत ५.५ गिगावॅट इतका ऑर्डर बुक आहे, ज्यात एनटीपीसीकडून मिळालेली मोठी ऑर्डरही आहे. आर्थिक वर्ष २५ मध्ये कंपनीने १,५५० मेगावॅट वीजपुरवठा केला, जो मागच्या वर्षीच्या तुलनेत तब्बल ११८% अधिक आहे. एवढंच नाही, तर व्यवस्थापनाने आर्थिक वर्ष २६ पासून प्रत्येक वर्षी किमान ६ गिगावॅट उत्पादन वाढवण्याचा उद्देश ठेवला आहे. यामधून स्पष्ट होतं की, कंपनीचा पाया मजबूत आहे आणि भविष्यात वाढीच्या अनेक संधी आहेत.
दुसरं नाव आहे JTL इंडस्ट्रीजचं. या कंपनीचा शेअर सध्या ७८ रुपयांच्या आसपास उपलब्ध आहे. ब्रोकरेज फर्म नुवामाने यासाठी १२३ रुपयांची लक्ष्य किंमत दिली आहे, म्हणजे तब्बल ५८% परताव्याची शक्यता. विशेष बाब म्हणजे या शेअरचा उच्चांक १२४ रुपये होता, आणि सध्या तो त्यापासून जवळपास ३७% सवलतीत मिळतो आहे. खरं तर Q4FY25 मध्ये कंपनीची कामगिरी थोडी नरम होती – व्हॉल्यूममध्ये तिमाही घसरण झाली आणि EBITDA प्रति टन घटला. पण हे केवळ तात्पुरतं चित्र आहे, असं ब्रोकरेजचं मत आहे.
JTL इंडस्ट्रीजने नवीन उत्पादन विभागात प्रवेश केला आहे आणि गॅल्वनाइज्ड पाइपलाइन Q4FY26 पर्यंत पूर्ण क्षमतेने कार्यान्वित होईल, असा अंदाज आहे. त्यामुळे उत्पादन आणि कमाईत सुधारणा होण्याची शक्यता आहे. कंपनीने EBITDA प्रति टन ४२००-४४०० रुपयांच्या दरम्यान ठेवण्याचं लक्ष्य दिलं आहे. शिवाय, DFT लाईन्स सुरू झाल्यामुळे आणि निर्यातीत वाढ झाल्यामुळे कंपनीच्या कामगिरीत स्पष्ट सुधारणा होण्याचा अंदाज आहे.
