Multibagger Stock : गुरुवारी शेअर बाजारात एक अनोखीच उत्सुकता पाहायला मिळाली. अनेक गुंतवणूकदारांचा ओढा एका अशा शेअरकडे वळलेला दिसला, ज्याची किंमत पाच वर्षांपूर्वी अवघी १२ पैसे होती. आज हाच शेअर जवळपास ₹४०च्या आसपास पोहोचला आहे. या झपाट्याने वाढलेल्या शेअरने काही निवडक आणि धीराने वाट पाहणाऱ्या गुंतवणूकदारांना कोट्यधीश बनवलंय. नाव आहे हुजूर मल्टी प्रोजेक्ट्स लिमिटेड.
२०१९-२० च्या काळात हा शेअर फारसा कुणाच्या नजरेत नव्हता. जून २०२० मध्ये याची किंमत ₹०.१२ इतकी नाममात्र होती. पण ज्यांनी त्या वेळी यावर विश्वास ठेवून ₹१ लाखांची गुंतवणूक केली, त्यांचं आजचं पोर्टफोलिओ तब्बल ₹३.३२ कोटींच्या आसपास आहे. याचाच अर्थ, या शेअरने ३३,००० टक्क्यांहून अधिक परतावा दिला आहे जो ‘मल्टीबॅगर’ या शब्दालाही लाजवेल असा आहे.
गुरुवारी या शेअरने ₹४०.२२ या भावाने दिवसाची सुरुवात केली. मागील सत्रातील बंद भाव ₹३९.८३ होता. सततच्या चढ-उतारांनंतर सध्या याचा व्यवहार ₹३९.८६ च्या आसपास होत आहे. या दमदार वाढीच्या पार्श्वभूमीवर अनेक नवोदित गुंतवणूकदारांचा उत्साह वाढलेला आहे, पण त्याचवेळी काही प्रश्नही उपस्थित होत आहेत ही वाढ टिकणार आहे का, की हे केवळ एखाद्या छोट्या कालखंडातील तेजीतून आलेलं यश आहे
हकीकत अशी आहे की दीर्घकालीन गुंतवणूकदारांना हा शेअर फायद्यात राहिला असला, तरी अलिकडच्या काळात याच कंपनीच्या कामगिरीत काहीशी घसरण झाली आहे. गेल्या एका वर्षात या शेअरमध्ये केवळ १३ टक्क्यांचीच वाढ झाली आहे. सहा महिन्यांमध्ये तो १७ टक्क्यांनी घसरलाय, आणि २०२५ या वर्षात आतापर्यंत जवळपास २५ टक्क्यांची घटही पाहायला मिळाली आहे.
कंपनीचे मार्च २०२५ तिमाहीचे निकाल बघितल्यास, यातील कारणे अधिक स्पष्ट होतात. निव्वळ नफा गेल्या वर्षीच्या तुलनेत ६९ टक्क्यांनी घसरून ₹१६.७८ कोटींवर आला आहे. मुख्य व्यवसाय असलेल्या रिअल इस्टेटमधील महसूलही ४६ टक्क्यांनी कमी झाला असून तो ₹४६४ कोटींवरून ₹२४९ कोटींवर आला आहे. तरीही, कंपनीने शेअरहोल्डर्सना ₹०.२० चा अंतिम लाभांश जाहीर करत गुंतवणूकदारांशी नातं कायम ठेवण्याचा प्रयत्न केला आहे.
हुजूर मल्टी प्रोजेक्ट्सचा प्रवास म्हणजे एका पेनी स्टॉकचं आश्चर्यजनक परिवर्तन. मात्र, गुंतवणुकीचा निर्णय घेताना अशा भरघोस परताव्याच्या कहाण्यांना केवळ आकर्षण न समजता, त्यामागची सध्याची आर्थिक स्थिती आणि भविष्यातील दिशा याचाही विचार करणं आवश्यक ठरतं. कारण शेअर बाजारात ‘काळजीपूर्वक उत्साह’ हेच यशाचं खरं सूत्र आहे.
