Multibagger Stock:- आज शेअर बाजारात पुन्हा एकदा एका विशेष कंपनीने गुंतवणूकदारांचे लक्ष वेधून घेतलं. टीआयएल लिमिटेड या कंपनीच्या शेअर्समध्ये मंगळवारी जोरदार उसळी पाहायला मिळाली आणि थेट वरच्या सर्किटवर जाऊन थांबले. मागील दोन वर्षांत या कंपनीने दिलेला परतावा पाहता, तिचा प्रवास खरंच लक्षवेधी वाटतो. अगदी दोन आकडी नफ्याची स्वप्नं पाहणाऱ्या गुंतवणूकदारांसाठी ही कंपनी आता तीन आकडी यशाचं उदाहरण बनली आहे.
टीआयएल लिमिटेड कंपनी कोणत्या क्षेत्रात करते काम?
टीआयएल लिमिटेड ही कंपनी प्रामुख्याने मटेरियल हँडलिंग आणि बांधकाम क्षेत्रात लागणाऱ्या अवजड यंत्रसामग्रीच्या उत्पादनात कार्यरत आहे. भारतात या क्षेत्रात कंपनीचे चांगलं नाव आहे. मात्र सध्या कंपनीने संरक्षण क्षेत्राकडेही पाऊल टाकलं आहे. लष्करी वापरासाठी अत्याधुनिक प्रणाली विकसित करण्यासाठी ‘टीआयएल डिफेन्स’ नावाने एक स्वतंत्र युनिट स्थापन करण्यात आलं आहे. त्यामुळे फक्त उद्योग-उपकरणांपुरते मर्यादित न राहता, आता कंपनी देशाच्या सुरक्षेसाठीही योगदान देणार आहे.
या कंपनीच्या शेअर्सची स्थिती काय?
शेअर बाजारात याचे पडसाद आधीच उमटायला सुरुवात झाली आहे. मे महिन्याच्या सुरुवातीपासून आतापर्यंत टीआयएल लिमिटेडच्या शेअर्समध्ये तब्बल ७१ टक्के वाढ झाली आहे. मागच्या वर्षी जुलै महिन्यातही या स्टॉकने १४६ टक्क्यांची भरारी घेतली होती. ऑगस्ट २०२४ मध्ये तर त्याने ४३५ रुपयांचा उच्चांक गाठला होता. मात्र याच प्रवासात मार्च २०२५ मध्ये १६७ रुपयांपर्यंत घसरणही झाली होती, हे विसरून चालणार नाही. तरीही, दीर्घकालीन गुंतवणूकदारांसाठी हा स्टॉक फारच फायदेशीर ठरला आहे.दोन वर्षांपूर्वी २९ रुपयांचा असलेला शेअर आज ३६३ रुपयांवर पोहोचला आहे, म्हणजे तब्बल ११४१ टक्क्यांची झेप.
कंपनीचा आर्थिक परफॉर्मन्स कसा आहे?
कंपनीच्या आर्थिक कामगिरीचाही मागोवा घेतला तर चित्र सकारात्मकच आहे. मार्च २०२५ च्या तिमाहीत कंपनीचा महसूल ११०.९० कोटी रुपये नोंदवला गेला आहे, जो गेल्या वर्षीच्या तुलनेत २४० टक्क्यांनी वाढलेला आहे. मागच्या तिमाहीच्या तुलनेतही ३४ टक्क्यांची भर पडली आहे. विशेष म्हणजे कंपनीचा EBITDA म्हणजेच मूळ व्यवसायातून होणारा नफा सकारात्मक झाला आहे. याच तिमाहीत तो २१.५ कोटी रुपयांवर गेला असून, मागच्या वर्षी याच कालावधीत तो २७ कोटी रुपयांच्या तोट्यात होता.
या सर्व घडामोडी पाहता, टीआयएल लिमिटेड ही कंपनी केवळ चांगले आकडे दाखवत नाहीये, तर ती एका नव्या दिशा आणि उद्दिष्टांसह पुढे सरकत आहे. गुंतवणूकदारांमध्ये निर्माण झालेला विश्वास आणि कंपनीचा उद्योगधंद्यांकडे असलेला दूरदृष्टीपूर्ण दृष्टिकोन यामुळे या शेअरकडे आता केवळ शॉर्ट टर्म नफा नव्हे, तर दीर्घकालीन संधी म्हणूनही पाहिलं जात आहे.
