Mutual Fund:- शेअर बाजार हा मोठ्या संधींसह जोखमींचाही खेळ समजला जातो व त्यामुळे अनेक गुंतवणूकदार बाजारातील अस्थिरतेमुळे थेट गुंतवणूक करण्यास संकोच करतात. परंतु याचा अर्थ असा नाही की तुम्हाला चांगला परतावा मिळू शकत नाही. जर तुम्हाला जोखीम कमी ठेवून सुरक्षित आणि स्थिर परतावा हवा असेल तर काही गुंतवणूक पर्याय तुमच्यासाठी सर्वोत्तम ठरू शकतात. हे पर्याय केवळ जोखीम कमी करतातच नाहीत, तर चांगला परतावा देखील देऊ शकतात.
सुरक्षित गुंतवणुकीचे पर्याय
डेट म्युच्युअल फंड
हा कमी जोखमीचा गुंतवणूक पर्याय आहे, जे प्रामुख्याने सरकारी आणि कॉर्पोरेट बाँडमध्ये गुंतवणूक करते. हे फंड शेअर बाजाराइतके अस्थिर नसतात. त्यामुळे सुरक्षिततेच्या दृष्टीने ते एक चांगला पर्याय मानले जातात. जरी यांचा परतावा तुलनेने थोडा कमी असतो तरीही जोखीम टाळायची असल्यास हा उत्तम पर्याय ठरतो.
संतुलित किंवा हायब्रिड फंड
हे अशा गुंतवणूकदारांसाठी योग्य आहेत. जे गुंतवणूकदार शेअर बाजारातील थोडी जोखीम घेत परंतु संतुलन राखू इच्छितात. या फंडांमध्ये काही हिस्सा शेअर बाजारात गुंतवला जातो आणि उर्वरित भाग कर्ज साधनांमध्ये गुंतवला जातो.
त्यामुळे जोखीम तुलनेने कमी राहते आणि दीर्घकालीन चांगला परतावा मिळतो. याचा फायदा असा आहे की बाजार घसरला तरी संपूर्ण गुंतवणुकीवर त्याचा फारसा परिणाम होत नाही.
बॅलन्स्ड अॅडव्हान्टेज फंड
हे बाजाराच्या स्थितीनुसार गुंतवणुकीचे प्रमाण ठरवतात. जेव्हा बाजार तेजीत असतो तेव्हा हे फंड इक्विटीमध्ये अधिक गुंतवणूक करतात आणि बाजार घसरल्यास सुरक्षित पर्यायांकडे वळतात. त्यामुळे दीर्घकालीन परतावा चांगला मिळतो. पण जोखीम नियंत्रित स्वरूपात राहते.
इक्विटी-लिंक्ड सेव्हिंग्ज स्कीम (ELSS)
हा कर बचतीचा उत्तम पर्याय आहे. या फंडांमध्ये किमान तीन वर्षांचा लॉक-इन कालावधी असतो.पण त्यातून चांगला परतावा मिळण्याची शक्यता असते. जरी यामध्ये काही प्रमाणात जोखीम असली तरी दीर्घकाळ गुंतवणुकीसाठी आणि कर बचतीसाठी हा एक चांगला पर्याय आहे. जोखीम स्वीकारण्याची तयारी असेल आणि कर वाचवायचा असेल तर ELSS फायदेशीर ठरू शकतो.
एकत्रित म्युच्युअल फंड हे वेगवेगळ्या प्रकारच्या फंडांचे मिश्रण असते. यामुळे जोखीम कमी होते आणि परतावा अधिक स्थिर राहतो. जर गुंतवणूकदारांना विविध गुंतवणूक प्रकारांमध्ये समान प्रमाणात गुंतवणूक करायची असेल आणि जोखीम व्यवस्थापन चांगल्या प्रकारे करायचे असेल तर हे फंड फायदेशीर ठरू शकतात.
मुदत ठेवी
हा नेहमीच सुरक्षित पर्याय मानला जातो. जर तुम्हाला कोणत्याही प्रकारचा धोका नको असेल आणि ठराविक मुदतीनंतर निश्चित परतावा हवा असेल तर एफडी हा एक सर्वोत्तम पर्याय आहे. जरी याचा परतावा तुलनेत कमी असला तरी तो पूर्णपणे सुरक्षित असतो आणि आर्थिक स्थिरता राखण्यास मदत करतो.
शेअर बाजारातील चढउतारांमुळे जर तुम्ही थेट गुंतवणूक करण्यास घाबरत असाल तर वरील पर्याय तुम्हाला दीर्घकालीन आणि सुरक्षित गुंतवणुकीचे उत्तम साधन ठरू शकतात.
तुमच्या आर्थिक उद्दिष्टांनुसार योग्य गुंतवणूक पर्याय निवडणे महत्त्वाचे आहे. दीर्घकालीन संपत्ती निर्माण करण्यासाठी आणि आर्थिक स्थिरता मिळवण्यासाठी गुंतवणुकीचे व्यवस्थित नियोजन करणे गरजेचे आहे.
