उत्तराखंडमधील चारधाम यात्रा 2025 ला काही दिवसांनंतर सुरू होणार असून, त्याची तयारी सध्या जोरात सुरू आहे. या वर्षीही केदारनाथ मंदिराला भेट देणाऱ्या भाविकांची संख्या मोठी असेल, असा अंदाज व्यक्त केला जात आहे.
त्यानुसार प्रशासनानेही आपली तयारी सुरू केली आहे. जर तुम्ही केदारनाथ यात्रेसाठी ऑनलाइन तिकीट बुकिंग कधीपासून सुरू होणार आणि त्यासाठी किती खर्च येणार याबाबत विचार करत असाल, तर येथे तुम्हाला सर्व माहिती मिळेल.
केदारनाथ यात्रेसाठी पायी प्रवास टाळून हेलिकॉप्टरने मंदिरापर्यंत पोहोचण्याची सुविधा उपलब्ध आहे. या हेलिकॉप्टर सेवेचे ऑनलाइन बुकिंग मंगळवार, 8 एप्रिल 2025 पासून सुरू झाले आहे. IRCTC च्या अधिकृत संकेतस्थळावर (heliyatra.irctc.co.in) दुपारी 12 वाजल्यापासून ही सुविधा उपलब्ध झाली आहे. भाविकांना या संकेतस्थळावरून आपले तिकीट बुक करता येईल.
चारधामाचे महत्व
उत्तराखंडमध्ये समुद्रसपाटीपासून 11,968 फूट उंचीवर वसलेले केदारनाथ धाम हे हिंदू धर्मातील सर्वात पवित्र तीर्थक्षेत्रांपैकी एक आहे. 12 ज्योतिर्लिंगांपैकी एक असलेल्या या मंदिराला दरवर्षी लाखो भाविक भेट देतात. हिमालयाच्या कुशीत वसलेले हे ठिकाण आध्यात्मिक आणि नैसर्गिक सौंदर्याने परिपूर्ण आहे.
हेलिकॉप्टर बुकिंग खर्च
सध्या सुरू झालेली हेलिकॉप्टर सुविधा ही 2 मे ते 31 मे 2025 या कालावधीसाठी आहे. या कालावधीत वेगवेगळ्या ठिकाणांहून केदारनाथ धामापर्यंतच्या प्रवासासाठी खालीलप्रमाणे शुल्क आकारले जाईल:
गुप्तकाशी ते केदारनाथ- ₹8532 (प्रति प्रवासी, दोन्ही बाजूंचा प्रवास)
फाटा ते केदारनाथ- ₹6062 (प्रति प्रवासी, दोन्ही बाजूंचा प्रवास)
सिरसी ते केदारनाथ- ₹6060 (प्रति प्रवासी, दोन्ही बाजूंचा प्रवास)
हेलिकॉप्टर सेवेला असणारी मागणी पाहता, भाविकांनी लवकरात लवकर बुकिंग करून ही सुविधा सुनिश्चित करावी, असे आवाहन प्रशासनाने केले आहे.
एकूण खर्च किती?
जर तुम्ही दिल्लीपासून केदारनाथपर्यंतचा प्रवास बसने करत असाल, तर दिल्ली ते देहरादून किंवा हरिद्वारपर्यंतचा खर्च ₹300 ते ₹1000 पर्यंत येऊ शकतो. तिथून गौरीकुंडपर्यंत बसने जाण्यासाठी सुमारे ₹500 खर्च येईल. हेलिकॉप्टरचा खर्च, राहण्याची सोय आणि खाण्यापिण्याचा खर्च धरून एकूण माणशी किमान ₹10,000 ते ₹15,000 खर्च अपेक्षित आहे. हा खर्च तुम्ही कोणत्या मार्गाने आणि कोणत्या सुविधांचा वापर करता यावर अवलंबून बदलू शकतो.
चारधाम यात्रेचे दरवाजे कधी उघडणार?
उत्तराखंडमधील चारधाम यात्रेत केदारनाथ, बद्रीनाथ, गंगोत्री आणि यमुनोत्री या चार पवित्र स्थळांचा समावेश आहे. यंदा या मंदिरांचे दरवाजे खालीलप्रमाणे उघडणार आहेत
गंगोत्री आणि यमुनोत्री- 30 एप्रिल 2025 (अक्षय्य तृतीया)
केदारनाथ- 2 मे 2025
बद्रीनाथ- 4 मे 2025
केदारनाथ मंदिराचे दरवाजे उघडण्याची तारीख महाशिवरात्रीला जाहीर केली जाते, तर बंद होण्याची तारीख विजयदशमीला ठरते. बद्रीनाथ मंदिराची दरवाजे सहसा केदारनाथनंतर काही दिवसांनी उघडली जातात.
दरवाजे बंद का होतात?
ऑक्टोबर-नोव्हेंबर महिन्यात उत्तराखंडमध्ये जोरदार हिमवृष्टी सुरू होते, ज्यामुळे केदारनाथ आणि इतर धामांपर्यंत जाणारे मार्ग बंद होतात. या काळात मंदिराची दरवाजे बंद ठेवली जातात. केदारनाथातील भगवान शंकराची मूर्ती उखीमठ येथील ओंकारेश्वर मंदिरात स्थापित करून तिथे पूजा केली जाते, तर बद्रीनाथातील मूर्तीची पूजा जोशीमठ येथील नरसिंह मंदिरात होते. दरवाजे उघडल्यानंतर या मूर्ती पुन्हा मंदिरात आणल्या जातात.
केदारनाथ यात्रेसाठी हेलिकॉप्टर बुकिंग सुरू झाले असून, भाविकांनी लवकरात लवकर आपले तिकीट निश्चित करावे, जेणेकरून त्यांना या पवित्र यात्रेचा लाभ घेता येईल.
