Post Office Scheme : भारतातील बहुतांश गुंतवणूकदार सुरक्षित गुंतवणुकीला प्राधान्य देतात. भांडवल सुरक्षित राहावे आणि नियमित उत्पन्न मिळावे, हीच त्यांची अपेक्षा असते.
त्यामुळे अनेक जण बँक मुदत ठेवी (FD) निवडतात. मात्र, पोस्ट ऑफिसच्या काही बचत योजना देखील स्थिर आणि खात्रीशीर परतावा देतात. त्यापैकीच एक लोकप्रिय योजना म्हणजे पोस्ट ऑफिस मंथली इन्कम स्कीम (POMIS).
ही योजना विशेषतः निवृत्त व्यक्ती, गृहिणी किंवा दरमहा ठराविक उत्पन्न शोधणाऱ्या गुंतवणूकदारांसाठी फायदेशीर मानली जाते. या योजनेत एकदाच ठराविक रक्कम गुंतवावी लागते आणि त्यावर मिळणारे व्याज दर महिन्याला खात्यात जमा होते. त्यामुळे घरखर्च, औषधे किंवा इतर आवश्यक खर्च भागवण्यासाठी ही योजना उपयुक्त ठरते.
सध्या POMIS वर सुमारे 6.6 टक्के वार्षिक व्याजदर दिला जातो. या योजनेत किमान 1,500 रुपयांपासून गुंतवणूक करता येते. सिंगल खात्यात जास्तीत जास्त 4.5 लाख रुपये, तर संयुक्त खात्यात 9 लाख रुपयांपर्यंत गुंतवणूक करण्याची परवानगी आहे.
उदाहरणार्थ, एखाद्या दांपत्याने संयुक्त खात्यात 9 लाख रुपये गुंतवले तर 6.6 टक्के दराने वर्षभरात सुमारे 59,400 रुपये व्याज मिळते. म्हणजेच दर महिन्याला सुमारे 4,950 रुपये खात्यात जमा होतात. पाच वर्षांच्या कालावधीत केवळ व्याजातूनच सुमारे 2.97 लाख रुपयांचे उत्पन्न मिळू शकते. महत्त्वाचे म्हणजे पाच वर्षांनंतर मूळ गुंतवलेली रक्कम पूर्णपणे परत मिळते.
या योजनेसाठी अर्जदार भारतीय नागरिक असणे आवश्यक आहे. अर्जदाराचे वय किमान 18 वर्षे असावे आणि तो भारतात वास्तव्यास असावा. खाते उघडण्यासाठी पोस्ट ऑफिस सेव्हिंग्स अकाउंट असणे गरजेचे आहे. जवळच्या पोस्ट ऑफिसमधून अर्ज फॉर्म घेऊन आवश्यक कागदपत्रांसह तो जमा करावा लागतो. नामनिर्देशनाची सुविधा देखील उपलब्ध आहे.
सरकारी हमी, स्थिर व्याजदर आणि दरमहा मिळणारे उत्पन्न या वैशिष्ट्यांमुळे पोस्ट ऑफिस मंथली इन्कम स्कीम सुरक्षित गुंतवणुकीसाठी एक उत्तम पर्याय ठरत आहे.
