SBI Bank Scheme : निवृत्तीनंतरचे जीवन आर्थिकदृष्ट्या सुरक्षित आणि तणावमुक्त असावे, यासाठी स्टेट बँक ऑफ इंडिया (SBI) ने केंद्र सरकारच्या पेन्शनधारकांसाठी ‘कॉम्प्रिहेन्सिव पेंशन पॅकेज’ ही विशेष योजना सुरू केली आहे. हे केवळ एक साधे बँक खाते नसून, ज्येष्ठ नागरिकांच्या दैनंदिन गरजांपासून ते आपत्कालीन परिस्थितीपर्यंत सर्व बाबींची काळजी घेणारे एक व्यापक सुरक्षा कवच आहे.
अर्थ मंत्रालयाच्या वित्तीय सेवा विभागाच्या पुढाकाराने हे पॅकेज सादर करण्यात आले असून, पेन्शनधारकांसाठी बँकिंग अधिक सोपे, सुरक्षित आणि लाभदायक बनवणे हा यामागचा मुख्य उद्देश आहे.
या पॅकेजचा सर्वात मोठा फायदा म्हणजे किमान शिल्लक न ठेवण्याची मुभा. केंद्र सरकारचे पेन्शनधारक आणि वय 70 वर्षे किंवा त्याहून अधिक असलेल्या ज्येष्ठ नागरिकांना या खात्यात शून्य शिल्लक असतानाही कोणतेही दंड किंवा शुल्क आकारले जाणार नाही.
तसेच, एसएमएस अलर्टसाठी कोणतेही शुल्क घेतले जाणार नाही. खातेदारांना मोफत रुपे प्लॅटिनम गोल्ड डेबिट कार्ड दिले जाईल, ज्यावरही कोणतेही वार्षिक शुल्क नसेल.
या पॅकेजची खरी ताकद म्हणजे त्यामध्ये समाविष्ट असलेले विमा संरक्षण. अपघाती मृत्यू झाल्यास कुटुंबाला तब्बल 30 लाख रुपयांपर्यंतचे वैयक्तिक अपघात विमा संरक्षण मिळणार आहे. यासोबतच, आपत्कालीन परिस्थितीत एअर अॅम्ब्युलन्ससाठी 10 लाखांपर्यंतची मदत आणि सामान्य अॅम्ब्युलन्ससाठी 50 हजार रुपयांपर्यंतचा खर्च दिला जाणार आहे.
SBI ने या योजनेत पेन्शनधारकांच्या कुटुंबीयांचाही समावेश केला आहे. अपघात झाल्यास कुटुंबातील दोन सदस्यांना घटनास्थळी पोहोचण्यासाठी 50 हजार रुपयांपर्यंतचा प्रवास खर्च, तसेच मृतदेह परत आणण्यासाठीही 50 हजार रुपयांची तरतूद करण्यात आली आहे.
याशिवाय, 18 ते 25 वयोगटातील मुलांसाठी उच्च शिक्षणासाठी 8 लाख रुपयांपर्यंतची आर्थिक मदत देण्यात येणार असून, मुलगी असल्यास ही मदत 10 लाख रुपयांपर्यंत वाढवण्यात आली आहे.
सध्या ही योजना प्रामुख्याने SBI मार्फत राबवण्यात येत असली तरी, भविष्यात पंजाब नॅशनल बँक, बँक ऑफ बडोदा, कॅनरा बँक आणि इंडियन बँक यांसारख्या इतर सार्वजनिक क्षेत्रातील बँकाही अशाच स्वरूपाची पॅकेजेस सुरू करण्याची शक्यता आहे. या योजनेचा लाभ घ्यायचा असल्यास, पात्र पेन्शनधारकांनी आपल्या जवळच्या SBI शाखेशी संपर्क साधावा, असे आवाहन करण्यात आले आहे.
