SBI Mutual Fund IPO : भारतीय गुंतवणूकदारांचा कल पारंपरिक बचतीपेक्षा ‘वेल्थ क्रिएशन’कडे झुकत असताना देशातील सर्वात मोठी सरकारी बँक स्टेट बँक ऑफ इंडिया (SBI) आपल्या सर्वाधिक नफा कमावणाऱ्या युनिटपैकी एक असलेल्या SBI म्युच्युअल फंडला शेअर बाजारात सूचीबद्ध करण्याच्या तयारीत आहे. या घडामोडीमुळे गुंतवणूक क्षेत्रात मोठी उत्सुकता निर्माण झाली आहे.
SBI चे चेअरमन चल्ला श्रीनिवासुलू सेटी यांनी दिलेल्या माहितीनुसार, सप्टेंबर 2026 पर्यंत किंवा त्यापूर्वीच SBI म्युच्युअल फंडचा आयपीओ (IPO) बाजारात आणण्याचा बँकेचा मानस आहे.
हा केवळ एका कंपनीचा आयपीओ नसून भारतीय आर्थिक क्षेत्रातील बदलत्या प्रवाहाचे प्रतीक मानला जात आहे. विशेष म्हणजे, SBI म्युच्युअल फंडने चालू आर्थिक वर्षात सुमारे 2200 कोटी रुपयांचा नफा कमावला आहे. यावरून कंपनीची मजबूत आर्थिक स्थिती आणि बाजारातील भक्कम स्थान स्पष्ट होते.
गेल्या काही वर्षांत गुंतवणुकीच्या पद्धतीत लक्षणीय बदल दिसून येत आहे. पूर्वी लोक बचत खाते किंवा मुदत ठेवींमध्ये (FD) पैसे ठेवण्यास प्राधान्य देत होते. मात्र आता वाढत्या महागाईच्या पार्श्वभूमीवर आणि अधिक परताव्याच्या अपेक्षेमुळे गुंतवणूकदार शेअर्स, म्युच्युअल फंड, पेन्शन फंड आणि इतर बाजाराधारित योजनांकडे वळले आहेत. परिणामी, बँकांमधील ठेवींमध्ये घट होत असून बँकांना निधी उभारण्यासाठी नवीन पर्यायांचा अवलंब करावा लागत आहे.
कर्ज क्षेत्रातही बदल जाणवत आहे. अनसिक्योर्ड पर्सनल लोनपेक्षा गोल्ड लोनकडे ग्राहकांचा कल वाढला आहे. देशांतर्गत आणि जागतिक स्तरावर सोन्याच्या वाढत्या किमतींमुळे कमी व्याजदरात कर्ज मिळणे सुलभ झाले आहे. या पार्श्वभूमीवर SBI ने कर्जवाढ मर्यादित ठेवत बॉण्ड मार्केटमधून निधी उभारण्याची रणनीती आखली आहे.
याशिवाय, ‘SBI जनरल इन्शुरन्स’लाही भविष्यात शेअर बाजारात सूचीबद्ध करण्याचा विचार सुरू आहे. जर ही लिस्टिंग झाली, तर SBI लाइफ इन्शुरन्स आणि SBI कार्ड्सप्रमाणे आणखी एक उपकंपनी सार्वजनिकरित्या व्यवहारासाठी उपलब्ध होईल.
एकंदरीत, SBI म्युच्युअल फंडचा प्रस्तावित IPO हा भारतीय गुंतवणूकदारांसाठी महत्त्वाची संधी ठरू शकतो. योग्य अभ्यास आणि दीर्घकालीन दृष्टीकोन ठेवून गुंतवणूक केल्यास चांगला परतावा मिळण्याची शक्यता तज्ज्ञ व्यक्त करत आहेत.
