Share Market : जागतिक बाजारपेठेत तांब्याच्या किमतींनी ऐतिहासिक उच्चांक गाठल्याचा थेट फायदा देशांतर्गत सार्वजनिक क्षेत्रातील मिनी-रत्न कंपनी हिंदुस्तान कॉपर लिमिटेडला झाला आहे. गुरुवारी कंपनीच्या शेअरमध्ये जबरदस्त तेजी पाहायला मिळाली. सलग चौथ्या दिवशी उसळी घेत या शेअरने तब्बल १८ टक्क्यांची वाढ नोंदवत ७३६.९ रुपये या पातळीवर पोहोचून ५२ आठवड्यांचा नवा उच्चांक प्रस्थापित केला.
विशेष म्हणजे, अवघ्या गेल्या दोन महिन्यांत हिंदुस्तान कॉपरचा शेअर जवळपास दुप्पट झाला आहे. या जोरदार तेजीमुळे कंपनीचे मार्केट कॅप ३०,००० कोटी रुपयांवरून थेट ७०,००० कोटी रुपयांच्या पुढे गेले आहे. त्यामुळे गुंतवणूकदारांचे लक्ष या शेअरकडे वेधले गेले आहे.
जागतिक बाजारात तांब्याचा ‘भडका’
हिंदुस्तान कॉपरमधील या तेजीमागे आंतरराष्ट्रीय बाजारातील तांब्याच्या दरवाढीचा मोठा वाटा आहे.
लंडन मेटल एक्सचेंज (LME) वर तांब्याचे दर ६.७ टक्क्यांनी वाढून १३,९६७ डॉलर प्रति टन या विक्रमी पातळीवर पोहोचले आहेत.
MCX (भारत) मध्ये तांब्याचे दर ८.४ टक्क्यांनी वाढून १,४३२.३५ रुपये प्रति किलो झाले आहेत.
का धावतोय हिंदुस्तान कॉपर?
नवीन तांब्याच्या खाणी विकसित होण्यासाठी मोठा कालावधी लागतो, तसेच सध्या उपलब्ध असलेल्या खनिजाची गुणवत्ता कमी होत चालली आहे. दुसरीकडे, इलेक्ट्रिक वाहनं, नवीकरणीय ऊर्जा आणि पायाभूत सुविधा प्रकल्पांमुळे तांब्याची मागणी झपाट्याने वाढत आहे. मागणीच्या तुलनेत पुरवठा कमी असल्याने किमती वाढत आहेत.
याशिवाय, जागतिक बाजारात अमेरिकन डॉलर कमकुवत झाल्याने कमोडिटी मार्केटमध्ये तेजी आली आहे. ट्रम्प प्रशासनाच्या अस्थिर धोरणांमुळे आणि वाढत्या भू-राजकीय तणावामुळे गुंतवणूकदार प्रत्यक्ष मालमत्तांकडे वळताना दिसत आहेत.
गुंतवणूकदारांची वाढती गर्दी
गेल्या तीन महिन्यांत हिंदुस्तान कॉपरमधील किरकोळ गुंतवणूकदारांची संख्या २ लाखांनी वाढून ८.३१ लाखांवर पोहोचली आहे. जानेवारी महिन्यातच या शेअरमध्ये ३६ टक्क्यांची वाढ झाली असून, २०१२ नंतरची ही जानेवारीतील सर्वोत्तम कामगिरी मानली जात आहे.
गुंतवणूकदारांसाठी सल्ला
तांत्रिक विश्लेषक अंशुल जैन यांच्या मते, हा शेअर सध्या ‘हाय मोमेंटम’ फेजमध्ये आहे. मात्र, झपाट्याने झालेल्या वाढीमुळे नफा वसुलीचा धोकाही नाकारता येत नाही.
गुंतवणूकदारांनी शेअर विकून बाहेर पडण्याऐवजी ७०० रुपयांवर ट्रेलिंग स्टॉप लॉस लावणे अधिक सुरक्षित ठरेल. किंमत या पातळीच्या वर टिकून राहिल्यास तेजी कायम राहण्याची शक्यता आहे; मात्र अचानक घसरण झाल्यास सावध राहणे गरजेचे आहे.
