Share Market Update : शेअर बाजारातील स्मॉलकॅप आयटी कंपनी इन्फोबीन्स टेक्नॉलॉजीज (InfoBeans Technologies) च्या शेअर्समध्ये बुधवारी जबरदस्त तेजी पाहायला मिळाली. कंपनीचे शेअर्स बीएसईवर थेट २० टक्क्यांनी वाढून ८८८.९० रुपयांवर पोहोचले. मजबूत तिमाही निकाल आणि ३:१ बोनस शेअर्सच्या घोषणेमुळे गुंतवणूकदारांमध्ये मोठा उत्साह निर्माण झाला आहे.
महत्वाचे म्हणजे, गेल्या एक वर्षात या कंपनीने गुंतवणूकदारांना १८२ टक्क्यांहून अधिक परतावा दिला आहे. त्यामुळे इन्फोबीन्स टेक्नॉलॉजीज हा शेअर सध्या स्मॉलकॅप सेगमेंटमधील चर्चेचा विषय ठरला आहे.
कंपनीने आपल्या शेअरधारकांना ३:१ या प्रमाणात बोनस शेअर्स देण्याची घोषणा केली आहे. म्हणजेच, गुंतवणूकदारांकडे असलेल्या प्रत्येक १ शेअरमागे ३ बोनस शेअर्स मोफत मिळणार आहेत. विशेष बाब म्हणजे, कंपनीकडून पहिल्यांदाच बोनस शेअर्स दिले जात आहेत. यासाठी २७ फेब्रुवारी २०२६ ही ‘रेकॉर्ड डेट’ निश्चित करण्यात आली आहे.
यासोबतच, कंपनीने सॉफ्टवेअर डिलिव्हरी प्रक्रिया अधिक वेगवान करण्यासाठी आपले नवीन एआय-पावर्ड ‘SDD एक्सेलरेटर’ सोल्यूशन देखील लाँच केले आहे. भविष्यातील तंत्रज्ञानावर भर देत कंपनीने केलेली ही घोषणा गुंतवणूकदारांच्या दृष्टीने सकारात्मक मानली जात आहे.
आर्थिक कामगिरीकडे पाहिल्यास, चालू आर्थिक वर्षाच्या तिसऱ्या तिमाहीत कंपनीचा नफा वार्षिक आधारावर १७३.२३ टक्क्यांनी वाढून १९.२९ कोटी रुपये झाला आहे.
गेल्या वर्षी याच कालावधीत हा नफा ७.०६ कोटी रुपये होता. कंपनीची निव्वळ विक्री ३९.८ टक्क्यांनी वाढून १३४.४६ कोटी रुपये झाली असून, EBITDA मध्ये ८८.८४ टक्क्यांची वाढ नोंदवली गेली आहे.
शेअरच्या कामगिरीबाबत बोलायचे झाले तर, २८ जानेवारी २०२५ रोजी शेअरची किंमत ३१४.४० रुपये होती, जी आता ८८८.९० रुपये झाली आहे. गेल्या सहा महिन्यांतच शेअरने ५६ टक्क्यांहून अधिक झेप घेतली आहे. या शेअरचा ५२ आठवड्यांचा उच्चांक १०३० रुपये, तर नीचांक २६९.९५ रुपये आहे.
मजबूत आर्थिक निकाल, बोनस शेअर्स आणि एआय आधारित नव्या सोल्यूशनमुळे इन्फोबीन्स टेक्नॉलॉजीज भविष्यातही गुंतवणूकदारांच्या रडारवर राहण्याची शक्यता आहे.
