Stock Market Rally:- आजच्या बाजारात वीज क्षेत्राशी संबंधित एका छोट्या पण झपाट्याने वाढणाऱ्या कंपनीने सर्वांचे लक्ष वेधून घेतले. राजेश पॉवर सर्व्हिसेस या कंपनीच्या शेअरमध्ये सलग तिसऱ्या दिवशी तेजी दिसून आली आणि गुंतवणूकदारांनी उत्साहाने खरेदी केली. आज इंट्राडेमध्ये शेअर ₹1,540 वर गेला, म्हणजेच सुमारे 2% वाढ आणि या वाढीला कारण ठरली GIFT सिटीकडून मिळालेली एक मोठी ऑर्डर.
कंपनीने शेअर बाजाराला कळवले की GIFT पॉवर कंपनी लिमिटेडकडून त्यांना SEZ आणि DTA या GIFT सिटीतील भागांसाठी पॉवर वितरण आणि बॅकअप सिस्टीम बसवण्याचे काम मिळाले आहे. या कामाची किंमत सुमारे ₹60 कोटी इतकी आहे आणि प्रकल्प 18 महिन्यांत पूर्ण होण्याची अपेक्षा आहे. अशा प्रकारच्या ऑर्डर्स कंपनीच्या भविष्यकाळासाठी सकारात्मक संकेत देतात आणि त्यामुळेच गुंतवणूकदारांचाही कंपनीवरचं विश्वास वाढत आहे.
राजेश पॉवर सर्व्हिसेसने गेल्या आर्थिक वर्षात जबरदस्त आर्थिक कामगिरी केली आहे. कंपनीचा महसूल मागच्या वर्षीच्या तुलनेत तब्बल २८८% ने वाढून ₹१,१०७ कोटींवर पोहोचला आहे. नफाही मोठ्या प्रमाणात उडी मारत २६०% च्या आसपास वाढला आहे. एवढंच नाही तर ऑपरेशन्समधून मिळणाऱ्या कमाईचे प्रमाणही स्थिर राहिले असून EBITDA मार्जिनमध्ये थोडीशी सुधारणा झाली आहे. यामुळे कंपनीच्या व्यवस्थापनाची आर्थिक शिस्त आणि वाढीच्या दृष्टीने घेतलेली दिशा स्पष्ट होते.
कंपनीच्या शेअरची कामगिरी कशी?
कंपनीचा शेअर डिसेंबर २०२४ मध्ये ₹३३५ या इश्यू किमतीवरून शेअर बाजारात आला आणि त्याच दिवशी ₹६६८ वर सूचीबद्ध झाला. त्यानंतर गेल्या सहा महिन्यांपैकी चार महिन्यांत तो चढत गेला. विशेष म्हणजे नुकत्याच एका सत्रात या शेअरने ₹१,५७२ या सर्वकालीन उच्चांकाला स्पर्श केला आणि सध्या IPO किंमतीपेक्षा तब्बल ३६०% वर व्यापार करत आहे. इतक्या कमी कालावधीत एवढी वाढ म्हणजे अनेक छोट्या गुंतवणूकदारांसाठीही मोठी संधी निर्माण करणारा अनुभव ठरतो आहे.
राजेश पॉवर सर्व्हिसेस ही कंपनी वीज प्रकल्पांच्या अभियांत्रिकी, खरेदी व बांधकाम या कामांमध्ये विशेष कौशल्य असलेली असून ती सबस्टेशन, ट्रान्समिशन लाईन्स आणि उच्च-दाब पॉवर सिस्टीम्स उभारण्यात पारंगत आहे. कंपनीचं सध्याचं मार्केट कॅप सुमारे ₹२,७०० कोटींच्या आसपास आहे.
