Solarium Green Energy IPO:- सोलरियम ग्रीन एनर्जी लिमिटेडचा आयपीओ शेअर बाजारात लवकरच दाखल होत आहे. हा आयपीओ 55 लाख शेअर्सचा पूर्णपणे नवीन इश्यू असून कंपनी या माध्यमातून 105.04 कोटी रुपये भांडवल उभारण्याच्या तयारीत आहे. इच्छुक गुंतवणूकदारांसाठी हा आयपीओ 6 फेब्रुवारी 2025 पासून खुला राहणार असून 10 फेब्रुवारी 2025 रोजी बंद होईल. कंपनीचे शेअर्स 13 फेब्रुवारी 2025 रोजी बीएसई एसएमईवर सूचीबद्ध होतील.
किती आहे प्राईस बँड?
या आयपीओसाठी प्राइस बँड 181 ते 191 रुपये प्रति शेअर निश्चित करण्यात आली आहे. गुंतवणूक करण्यासाठी किमान लॉट साइज 600 शेअर्सची असेल. किरकोळ गुंतवणूकदारांसाठी किमान गुंतवणूक रक्कम 114600 रुपये ठेवण्यात आली आहे.
या सार्वजनिक ऑफरमध्ये 50% शेअर्स पात्र संस्थात्मक गुंतवणूकदारांसाठी, 35% किरकोळ गुंतवणूकदारांसाठी आणि उर्वरित 15% बिगर-संस्थात्मक गुंतवणूकदारांसाठी राखीव ठेवण्यात आले आहेत.
ही कंपनी काय काम करते?
कंपनी या इश्यूमधून उभारलेल्या निधीचा उपयोग कार्यकारी भांडवलाच्या गरजा भागवण्यासाठी आणि सामान्य कॉर्पोरेट उद्देशांसाठी करणार आहे. सोलरियम ग्रीन एनर्जी लिमिटेड ही सौर ऊर्जा उपाययोजनांमध्ये कार्यरत असलेली कंपनी आहे.
ही कंपनी निवासी, वाणिज्यिक, औद्योगिक आणि सरकारी सौर प्रकल्पांसाठी डिझाइन, अभियांत्रिकी, खरेदी, बांधकाम, चाचणी, कमिशनिंग, ट्रान्समिशन सिस्टम आणि ऑपरेशन आणि देखभाल यासह टर्नकी सोल्यूशन्स पुरवते.
कंपनी टर्नकी ईपीसी (अभियांत्रिकी, खरेदी आणि कमिशनिंग) कंत्राटे पुरवते. ज्यामध्ये साइट मूल्यांकन, तंत्रज्ञान मूल्यांकन, अभियांत्रिकी, पुरवठा साखळी व्यवस्थापन, बांधकाम, लॉजिस्टिक्स, मनुष्यबळ व्यवस्थापन,
आर्थिक नियोजन आणि सौर प्रकल्पांसाठी वॉरंटी सेवा यांचा समावेश होतो. मागील तीन वर्षांत कंपनीने 11195 निवासी, 172 वाणिज्यिक व औद्योगिक आणि 17 सरकारी सौर प्रकल्प यशस्वीरित्या पूर्ण केले आहेत.
कंपनीचा महसूल
आर्थिक वर्ष 2023-24 मध्ये कंपनीने 177.81 कोटी रुपयांचा महसूल नोंदवला असून करानंतर 15.59 कोटी रुपयांचा नफा कमावला आहे.तसेच चालू आर्थिक वर्षात 30 सप्टेंबर 2024 पर्यंत कंपनीचे उत्पन्न 82.34 कोटी रुपये आणि करोत्तर नफा 7.55 कोटी रुपये इतका झाला आहे.
या आयपीओच्या व्यवस्थापनासाठी बीलाइन कॅपिटल ऍडव्हायझर्स प्रायव्हेट लिमिटेड ही मुख्य बुक रनिंग मॅनेजर म्हणून काम पाहणार आहे. तर लिंक इनटाइम इंडिया प्रायव्हेट लिमिटेड या इश्यूची रजिस्ट्रार असेल.
सोलरियम ग्रीन आयपीओचा मार्केट मेकर स्प्रेड एक्स सिक्युरिटीज प्रायव्हेट लिमिटेड आहे. या आयपीओतून गुंतवणूकदारांना चांगला परतावा मिळण्याची शक्यता असून त्याकडे बाजारातील अनेक गुंतवणूकदारांचे लक्ष लागले आहे.
