गुरुवार, १२ जून रोजी शेअर बाजारात चांगलाच गोंधळ उडाला. सकाळच्या सत्रात सकारात्मक सुरुवात झाल्यानंतर बाजार काही वेळातच घसरायला लागला आणि दुपारपर्यंत सेन्सेक्स व निफ्टी दोघेही लाल चिन्हात गेले. यामागचं मुख्य कारण म्हणजे एअर इंडियाच्या प्रवासी विमानाचा झालेला भीषण अपघात. ही दुर्दैवी घटना घडली आणि त्याचा त्वरित परिणाम बाजारात दिसून आला. विशेषतः टाटा ग्रुपच्या कंपन्यांचे शेअर्स मोठ्या प्रमाणात खाली आले.
अहमदाबादमध्ये टेकऑफच्या दरम्यान एअर इंडियाचं एक बोईंग ७३७ विमान कोसळल्याचं समोर आलं आहे. विमान लंडनकडे निघालं होतं पण मोठा अपघात घडला. या अपघातात २४२ प्रवासी असलेल्या विमानात १५० पेक्षा अधिक लोकांच्या मृत्यूची भीती व्यक्त केली जात आहे. अपघात झाल्यानंतर बाजारात चिंता आणि घबराट पसरली आणि टाटा समूहाशी संबंधित शेअर्सवर त्याचा थेट परिणाम झाला.
टाटा ग्रुपने एअर इंडिया ताब्यात घेतल्यापासून ही कंपनी त्यांच्या ब्रँडचा भाग बनली आहे. त्यामुळे एअर इंडियाच्या अपघाताचा धक्का केवळ विमान वाहतूक क्षेत्रापुरता मर्यादित राहिला नाही, तर गुंतवणूकदारांनी संपूर्ण टाटा समूहाच्याच शेअर्सकडे संशयाने पाहायला सुरुवात केली. परिणामी, टाटा मोटर्स, टाटा स्टील, टाटा पॉवर, टाटा कंझ्युमर, टाटा केमिकल्स, टीसीएस आणि इतर टाटा कंपन्यांचे शेअर्स घसरले. काही शेअर्समध्ये तीन टक्क्यांपेक्षा जास्त घसरण झाली.
टीसीएसमध्ये किंचित घसरण झाली असली तरी टाटा मोटर्ससारख्या शेअर्सने जवळपास साडेतीन टक्क्यांची घसरण अनुभवली. टाटा स्टील, टाटा केमिकल्स आणि टाटा इन्व्हेस्टमेंट सारख्या शेअर्समध्ये देखील स्पष्ट घसरण पाहायला मिळाली. टाटा समूहातील जवळपास सर्वच कंपन्यांच्या शेअर्सवर ही घटना जणू सावलीसारखी पसरली.
दुपारच्या सुमारास, सेन्सेक्स सुमारे ९८० अंकांनी खाली आला आणि ८१,५३२ च्या आसपास व्यापार करत होता. निफ्टीदेखील घसरत २४,८५० च्या खाली पोहोचला. विशेष म्हणजे, बाजार सुरुवातीला सकारात्मक दिसत होता, पण विमान अपघाताची बातमी येताच सर्व दृष्टीकोन बदलला.
