सध्या अनेक नोकरदारांना पेन्शन मिळणार नाही. त्यामुळे नोकरीनंतर काय? हा प्रश्न अनेकांना पडतो. काहीजण निवृत्तीनंतरच्या आयुष्याचे नियोजन आत्ताच करुन ठेवतात. चांगल्या फंडात गुंतवणूक करतात. तुम्हालाही जर निवृत्तीनंतरचे जीवन सुरक्षित करायचे असेल, तर राष्ट्रीय पेन्शन योजना म्हणजेच एनपीएस तुमच्यासाठी एक चांगला पर्याय असू शकतो. ही एक दीर्घकालीन निवृत्ती गुंतवणूक योजना आहे. त्याचीच माहिती आपण घेऊयात.
एनपीएसमध्ये कोण खाते उघडू शकते?
कोणताही भारतीय नागरिक एनपीएस खाते उघडू शकतो. यासाठी त्याचे वय 18 वर्षे ते 70 वर्षांच्या दरम्यान असावे. नोकरी, व्यवसाय, फ्रीलांसर, स्वयंरोजगाराशी संबंधित लोक देखील यात सामील होऊ शकतात.
कोणती कागदपत्रे लागतात?
– आधार कार्ड
– पॅन कार्ड
– निवासी पुराव्यासाठी मतदार ओळखपत्र
– बँक खाते
– पासपोर्ट आकाराचा फोटो
– सक्रिय मोबाइल नंबर आणि ईमेल आयडी
पेन्शन कशी मिळते?
या योजनेत गुंतवणूक करणारी व्यक्ती दरमहा किंवा वर्षाला एक निश्चित रक्कम जमा करते. हे पैसे व्यावसायिक निधी व्यवस्थापकांद्वारे शेअर बाजार, सरकारी बाँड आणि इतर वित्तीय साधनांमध्ये गुंतवले जातात. जेव्हा गुंतवणूकदाराचे वय 60 वर्षे होते तेव्हा त्याला जमा केलेल्या रकमेचा काही भाग एकरकमी मिळतो. उर्वरित रकमेतून त्याला दरमहा पेन्शन मिळत राहते.
NPS चे फायदे काय?
– यामुळे निवृत्ती निधी जमा होण्यास मदत होते.
– दरवर्षी 2 लाख रुपयांपर्यंत कर सवलत उपलब्ध आहे.
– ईपीएफ आणि पीपीएफपेक्षा जास्त परतावा मिळण्याची शक्यता आहे.
– हे पेन्शन नियामक प्राधिकरणाद्वारे संरक्षित आहे.
– इतर गुंतवणूक पर्यायांच्या तुलनेत शुल्क कमी आहे, त्यामुळे तुम्हाला दीर्घकाळात जास्त परतावा मिळतो.
– जेव्हा तुम्ही 60 वर्षांचे व्हाल तेव्हा या अंतर्गत 60% पैसे करमुक्त काढता येतील.
– त्याच वेळी 40% पैसे पेन्शनसाठी वापरले जातात, ज्यामुळे तुम्हाला दरमहा निश्चित उत्पन्न मिळते.
एनपीएस खाते कसे उघडायचे?
एनपीएस खाते उघडण्यासाठी, तुम्ही ऑनलाइन आणि ऑफलाइन दोन्ही प्रकारे अर्ज करू शकता. ऑनलाइनसाठी, तुम्हाला eNPS पोर्टल https://enps.nsdl.com किंवा https://enps.kfintech.com वर भेट देऊन नोंदणी करावी लागेल. ऑफलाइन खाते उघडण्यासाठी, तुम्ही बँक, पोस्ट ऑफिस किंवा अधिकृत NPS सेवा केंद्रात (POP-Points) खाते उघडू शकता.
