मित्रानो आजकाल, क्रेडिट कार्डचा वापर लक्षणीय प्रमाणात वाढला आहे. हे केवळ खरेदीसाठीच नव्हे, तर आपत्कालीन परिस्थितीत रोख रक्कम काढण्यासाठीही उपयुक्त ठरते. मात्र, आर्थिक अडचणी टाळण्यासाठी तुम्ही क्रेडिट कार्डमधून पैसे काढण्यापूर्वी त्यासंबंधीच्या महत्त्वाच्या अटी आणि शर्ती जाणून घेणे आवश्यक आहे.आज आपण ह्याबद्दल सविस्तर माहिती जाणून घेऊयात.
१. कॅश अॅडव्हान्स चार्जेस
क्रेडिट कार्डद्वारे रोख रक्कम काढल्यास बँक त्यावर कॅश अॅडव्हान्स शुल्क आकारते. हे शुल्क साधारणतः काढलेल्या रकमच्या २% ते ३% दरम्यान असते आणि ते थेट क्रेडिट कार्ड बिलामध्ये समाविष्ट होते. उदाहरणार्थ, जर तुम्ही ₹१०,००० काढले आणि शुल्क ३% असेल, तर तुम्हाला ₹३०० अतिरिक्त द्यावे लागतील.
२. व्याजदराची गणना
क्रेडिट कार्डद्वारे रोख रक्कम काढल्यास लगेच व्याज लागू होते, जे सामान्य खरेदीच्या तुलनेत वेगळे असते. खरेदीवर २० ते ५० दिवसांचा ग्रेस पीरियड मिळतो, पण रोख रक्कम काढल्यावर कोणताही ग्रेस पीरियड दिला जात नाही. या व्यवहारावर वार्षिक २४% ते ४८% इतका उच्च व्याजदर लागू होऊ शकतो, जो रक्कम काढल्याच्या दिवसापासून सुरू होतो.
३. रोख मर्यादा
प्रत्येक क्रेडिट कार्डला ठरावीक रोख मर्यादा असते, जी बहुतेक वेळा कार्डच्या एकूण क्रेडिट मर्यादेच्या २०% ते ४०% दरम्यान असते. या मर्यादेपेक्षा अधिक रक्कम काढण्याचा प्रयत्न केल्यास व्यवहार अपयशी ठरू शकतो.
४. क्रेडिट स्कोअरवर परिणाम
जर तुम्ही वेळेत क्रेडिट कार्डची रोख भरली नाही, तर त्याचा तुमच्या क्रेडिट स्कोअरवर नकारात्मक परिणाम होऊ शकतो. कमी क्रेडिट स्कोअरमुळे भविष्यात कर्ज किंवा नवीन क्रेडिट कार्ड मिळवणे कठीण होऊ शकते.
क्रेडिट कार्डमधून रोख रक्कम काढण्याआधी त्याच्या अटी आणि शर्ती समजून घेणे आवश्यक आहे. शुल्क, व्याजदर आणि क्रेडिट स्कोअरवरील परिणाम यांचा विचार न करता पैसे काढल्यास आर्थिक अडचणी निर्माण होऊ शकतात. त्यामुळे, गरज असेल तेव्हाच हा पर्याय वापरणे शहाणपणाचे ठरेल.
