स्वच्छ आणि नीटनेटकं घर कोणाला नको असतं? प्रत्येकाचं स्वप्न असतं की आपलं घर नेहमी आरशासारखं चमकत राहावं. पण कधी कधी आपणच काही छोट्या छोट्या चुका करत असतो, ज्या घराच्या सौंदर्यावर पाणी फेरतात आणि त्याचवेळी आपल्या मेहनतीच्या वेळेसोबतच खर्चही वाढवतात. हे सगळं लक्षात न घेता आपण रोजच्या साफसफाईच्या कामात जेव्हा तीच चुकांची पुनरावृत्ती करतो, तेव्हा घर स्वच्छ वाटण्याऐवजी अधिकच विस्कटलेलं आणि निस्तेज भासतं.
क्लिनर
घर साफ करताना सगळ्यांत सामान्य पण घातक सवय म्हणजे क्लिनर थेट फर्निचरवर किंवा काचांवर फवारणं. हे पाहायला सहज वाटतं, पण या कृतीमुळे नाजूक पृष्ठभागावर थर बसतो, रंग फिकट होतो आणि हळूहळू त्या वस्तू खराब होऊ लागतात. त्याऐवजी, क्लिनर मायक्रोफायबर कापडावर फवारणं आणि मगच पृष्ठभाग स्वच्छ करणं जास्त सुरक्षित ठरतं.
व्हॅक्यूमिंग
अनेकदा आपण व्हॅक्यूमिंग आधीच सुरू करतो आणि नंतर धूळ झटकतो. हे पूर्ण उलटं आहे. कारण वरून खाली हीच योग्य पद्धत आहे. आधी शेल्फ, पंखे आणि उंच जागा स्वच्छ केल्या, तर खाली जमिनीवर साचलेली धूळ शेवटी व्हॅक्यूमिंगने पूर्ण निघून जाते. अन्यथा, आधी व्हॅक्यूम केल्यावर वरून धूळ पडल्याने काम पुन्हा करावं लागतं.
ब्लीच
काही जणांना वाटतं की ब्लीच म्हणजे जादूचं पाणी, पण हे सगळीकडे वापरता येत नाही. ब्लीच स्टेनलेस स्टीलला गंजवू शकतं, रंगीत कपड्यांचे रंग खराब करू शकतं आणि घरातल्या दगडी पृष्ठभागांवर त्याचा वापर केल्यास नैसर्गिक चमकही नष्ट होऊ शकते. त्यामुळे, प्रत्येक वस्तूसाठी योग्य क्लिनर वापरणं हीच शहाणपणाची गोष्ट.
वॉशिंग मशीन
कपडे धुण्याची घाई करताना आपण वॉशिंग मशीन भरून टाकतो, पण त्यामुळे ना कपडे व्यवस्थित धुतले जातात ना मशीनला आराम मिळतो. ओव्हरलोडिंग केल्याने मशीन खराब होण्याचा धोका वाढतो आणि स्वच्छतेचा दर्जाही खालावतो. त्यामुळे नेहमी योग्य प्रमाणातच कपडे टाका.
लाकडी वस्तू ही घराची शोभा असतात, पण त्या स्वच्छ करण्यासाठी व्हिनेगर, ब्लीचसारखे क्लिनर वापरल्यास लाकडाची चमक हरवते आणि पृष्ठभाग निस्तेज होतो. सौम्य साबण आणि पाण्याचं मिश्रण किंवा खास लाकडी वस्तूंकरिता क्लिनर यांचा वापर अधिक उपयुक्त ठरतो.
स्वच्छता साधनं आणि कपडे यांचं योग्य व्यवस्थापनही महत्त्वाचं आहे. एकदाच वापरून टाकलेली मॉप्स, स्पंज किंवा कपडे पुन्हा न धुता वापरल्यास त्यामधूनच घाण एका जागेवरून दुसऱ्या जागी पोहोचते. शिवाय, त्यामधून जंतूही पसरू शकतात. त्यामुळे दर काही दिवसांनी हे साधनं धुऊन, सुकवून, निर्जंतुक करणं गरजेचं आहे.
