कधीकधी आपल्या मनात अनेक विचारांची गर्दी होते आणि आपणच त्या विचारांच्या जाळ्यात अडकतो. काही लोक हे अगदी स्वभावतः जास्त विचार करणारे असतात. त्यांना एखाद्या गोष्टीचा निर्णय घेण्यापेक्षा त्यावर विचार करत राहण्यातच अधिक रस वाटतो. अंकशास्त्राच्या दृष्टिकोनातून पाहिलं, तर यामागे त्यांच्या जन्मतारखेशी संबंधित एक विशिष्ट आकडा म्हणजेच ‘मूलांक’ जबाबदार असतो. हा मूलांक त्यांच्या स्वभावाला, भावनात्मकतेला आणि निर्णयक्षमतेलाही आकार देतो.
मूलांक म्हणजे काय, हे समजून घेणं सोपं आहे. आपल्या जन्मतारखेतील सर्व अंकांची बेरीज केली, तर जो अंतिम आकडा येतो, तोच आपला मूलांक. उदाहरणार्थ, जर एखाद्याचा जन्म 12 तारखेला झाला असेल, तर 1 आणि 2 यांची बेरीज करून मूलांक 3 मिळतो. आता प्रश्न असा आहे की, कोणते मूलांक असलेले लोक अधिक विचार करत राहतात आणि त्यांना त्या विचारांचे ओझं का वाटते?
मूलांक 7
सुरुवात करूया मूलांक 7 पासून. हा मूलांक असलेल्या लोकांचं मन म्हणजे विचारांची खोल खाणच जणू. त्यांना एखादी गोष्ट वरवर समजली तरी समाधान होत नाही. प्रत्येक गोष्ट खोलवर समजून घ्यायची त्यांची सवय असते आणि हेच त्यांना सतत विचारांच्या वादळात ओढतं. अनेकदा ते एखाद्या गोष्टीचा अर्थ लावण्यात इतके गुंततात की, स्वतःच हरवून जातात. त्यांच्या या सवयीमुळे त्यांचं आयुष्य अधिक गोंधळाचं होतं, पण त्याचवेळी हे लोक अंतर्मुख, समंजस आणि अभ्यासूही असतात.
मूलांक 2
मूलांक 2 असलेले लोक याहीपेक्षा वेगळे नाहीत. त्यांच्यात कल्पनाशक्तीचं जबरदस्त सामर्थ्य असतं. हीच कल्पकता त्यांना इतरांपेक्षा वेगळं बनवते. पण त्यांच्या भावनांची खोलीही प्रचंड असते. दुसऱ्यांच्या भावनांना समजून घेण्याची त्यांच्यात विलक्षण क्षमता असते, पण याच संवेदनशीलतेमुळे ते अनेकदा एकटे पडतात. त्यांच्या मनात सतत चालणारे विचार, नाती टिकवण्याची धडपड आणि स्वतःच्या भावनांची गुंतवळ यामुळे त्यांचं आयुष्य एक भावनिक झुला बनून जातं.
मूलांक 6
आता बोलूया मूलांक 6 असलेल्या लोकांबद्दल. त्यांचं जीवन थोडं झगमगणारं असतं. शुक्र ग्रह त्यांच्या मूलांकावर अधिराज्य गाजवत असल्यामुळे सौंदर्य, पैसा आणि यश त्यांच्या आयुष्यात भरभरून असतो. हे लोक आकर्षक, प्रेमळ आणि लोभस स्वभावाचे असतात. पण त्यांच्या वैभवामागेही एक मानसिक संघर्ष लपलेला असतो. सतत विचार करत राहण्याची सवय, योग्य निर्णय न घेता होणारी घालमेली आणि अंतर्मनात चाललेली द्वंद्वं यामुळे ते अनेकदा संधी गमावतात. पैसा मिळतो, प्रसिद्धी मिळते, पण स्थिरता मिळत नाही आणि याचं मूळ त्यांच्या अति विचार करणाऱ्या वृत्तीत आहे.
या सर्व मूलांकांमध्ये एक गोष्ट मात्र समान आहे, ही मंडळी मनापासून नातेसंबंध जपतात. एकदा का कुणाला आपलंसं मानलं, की त्या नात्यात ते स्वतःला झोकून देतात. मग त्या नात्यासाठी विचारांची गर्दी झाली, मनात प्रश्नांनी गर्दी केली, तरी ते माघार घेत नाहीत. त्यांच्या अति विचार करण्याच्या सवयीला दोष देता येईल, पण त्याच विचारांतून उमटणाऱ्या भावना त्या मात्र अत्यंत शुद्ध आणि प्रेमळ असतात.
