90 च्या दशकातील प्रसिद्ध अभिनेत्री करिश्मा कपूरने चित्रपटसृष्टीत आपल्या अभिनयाने आणि सौंदर्याने लाखो लोकांना भुरळ घातली. करिश्मा आज जरी रुपेरी पडद्यावर दिसत नसली तरी ती कायम चर्चेत असते. विशेषतः तिचा एक्स पती संजय कपूरच्या मृत्यूनंतर तिच्या आर्थिक स्थितीबाबत आणि ती कशी जगते याबाबत अनेक चर्चांना उधाण आले आहे.
करिश्मा कपूरचं वैयक्तिक आयुष्य नेहमीच प्रकाशझोतात राहिलं. 2003 मध्ये तिनं दिल्लीतील उद्योजक संजय कपूरशी लग्न केलं, परंतु काही वर्षांतच दोघांमध्ये दुरावा निर्माण झाला आणि 2016 मध्ये त्यांचा अधिकृत घटस्फोट झाला. या नात्यांतून करिश्माला दोन मुलं समायरा आणि कियान राज मिळाले, ज्यांना ती एकटीच लहानाचे मोठे करत आहे. ‘सिंगल मदर’ म्हणून तिची भूमिका आज अनेक महिलांसाठी प्रेरणादायी आहे.
ब्रँड आणि व्यवसायातून कोट्यवधींची कमाई
चित्रपटांपासून दूर राहूनही करिश्मा आर्थिकदृष्ट्या किती स्वावलंबी आहे, हे पाहून अनेकांना आश्चर्य वाटू शकतं. खरंतर, तिने आपल्या करिअरच्या काळात कमावलेलं नाव, प्रसिद्धी आणि कौशल्य यांचा चांगला उपयोग करून घेतला आहे. आज ती जाहिराती, ब्रँड एंडोर्समेंट, फॅशन शो आणि इव्हेंट्समधून चांगली कमाई करते. याशिवाय, ती BabyOye नावाच्या ऑनलाइन बाळांच्या उत्पादने विकणाऱ्या कंपनीमध्येही शेअरहोल्डर आहे, जी तिच्या उत्पन्नाचा एक महत्त्वाचा स्रोत ठरतो.
कधीमधी ती रिअॅलिटी शो किंवा विशेष कार्यक्रमांतून देखील झळकते आणि यासाठी ती मोठी रक्कम आकारते. टीव्हीवरील तिची उपस्थिती क्वचित असली तरी, तिच्या नावाचं वजन अजूनही टिकून आहे. ब्रँड्ससाठी तिची विश्वासार्हता आणि प्रतिष्ठा अजूनही अबाधित आहे.
एकूण संपत्ती किती?
तिच्या संपत्तीबाबत बोलायचं झालं तर, मीडिया रिपोर्ट्सनुसार, करिश्मा कपूरकडे सध्या अंदाजे 85 ते 90 कोटी रुपयांची एकूण मालमत्ता आहे. ही संपत्ती केवळ तिच्या अभिनय कारकिर्दीमुळे नाही, तर स्मार्ट इन्व्हेस्टमेंट्स, संपत्ती व्यवस्थापन आणि सध्याच्या व्यावसायिक उपक्रमांमुळे टिकून आहे.
मुंबईच्या खार भागातील तिचं आलिशान अपार्टमेंट तिनं 10.11 कोटी रुपयांना विकल्याचंही वृत्त आहे, जे दाखवतं की ती आर्थिक व्यवहारांमध्ये देखील सावध आणि दूरदृष्टी असलेली स्त्री आहे. आज ती एक स्वतंत्र, आत्मनिर्भर आणि जबाबदार आई म्हणून तिच्या मुलांच्या संगोपनावर लक्ष केंद्रीत करत आहे.
