नारळ पाणी हे निसर्गदत्त टॉनिक मानले जाते. शरीराला थंडावा देणारे, शरीरातील इलेक्ट्रोलाइट्सचा समतोल राखणारे आणि त्वचेसाठीही फायदेशीर मानले जाणारे हे पेय अनेकांच्या रोजच्या आहाराचा भाग असते. मात्र, नारळ पाणी पिल्यानंतर लगेच काही चुकीच्या गोष्टी खाल्ल्यास याचे चांगले परिणाम होण्याऐवजी तुमच्या पाचनसंस्थेवर उलट परिणाम होऊ शकतात.
तेलकट मसालेदार पदार्थ
सर्वसाधारणपणे नारळ पाणी पिताना आपण त्याच्या नैसर्गिक थंडपणाकडे दुर्लक्ष करतो आणि लगेच जेवण करतो, पण त्याने पोटात गॅस, आम्लता, फुगवटा किंवा जळजळ यांसारख्या त्रासाला सामोरे जावे लागते. नारळ पाणी पिल्यानंतर लगेच तेलकट आणि मसालेदार अन्न खाल्ल्यास पचनक्रिया बिघडते. त्यात वापरलेले तेल, मसाले आणि गरमपणा यामुळे शरीरात उष्णता निर्माण होते, जी नारळ पाण्याच्या थंडपणाशी विसंगत ठरते.
लिंबूवर्गीय फळे
तसेच, नारळ पाणी पिल्यानंतर लगेच लिंबूवर्गीय फळे जसे की संत्रा, लिंबू किंवा मोसंबी खाल्ल्यास पचनाच्या आम्लतेचा त्रास वाढू शकतो. हे फळं नैसर्गिक स्वरूपात आम्लयुक्त असतात, त्यामुळे नारळ पाण्याने थंडावलेली पचनसंस्था त्याला लगेच योग्य प्रतिसाद देत नाही.
प्रथिनेयुक्त पदार्थ
याचप्रमाणे मसूर, पनीर किंवा इतर प्रथिनेयुक्त अन्न देखील नारळ पाण्याच्या नंतर लगेच खाल्ल्यास पचनावर भार येतो. शरीराला या अन्नाचे पचन करण्यासाठी अधिक वेळ आणि ऊर्जा लागते. परिणामी पोटात गॅस, गडबड किंवा थकवा जाणवू शकतो.
थंड पदार्थ
दही, ताक किंवा आईस्क्रीमसारखे थंड पदार्थ तर विशेषतः टाळावेत. नारळ पाणी हे स्वतःच थंड असते आणि त्यानंतर अशा थंड गोष्टी घेतल्याने पोटातील तापमान एकदम कमी होते, ज्यामुळे पचनसंस्था सवयीने काम करत नाही आणि अशक्तपणा, अपचन, अतिसारसारखे त्रास होऊ शकतात.
फायबरयुक्त अन्न
अनेकदा आरोग्यासाठी उपयुक्त असलेले जास्त फायबरयुक्त अन्नसुद्धा नारळ पाण्यानंतर त्वरित खाल्ल्यास पोट फुगणे, गॅस आणि अपचन यांसारखी लक्षणं दिसू शकतात. विशेषतः कच्च्या भाज्या, स्प्राउट्स किंवा ओट्ससारख्या पदार्थांचा पचनावर परिणाम होतो.
तज्ज्ञांच्या मते, नारळ पाणी घेतल्यानंतर किमान 30 ते 45 मिनिटे कोणताही पदार्थ खाणे टाळावे. हे पचनक्रियेस एकसंध ठेवण्यासाठी आणि नारळ पाण्याचे संपूर्ण फायदे मिळवण्यासाठी आवश्यक आहे.
