जेव्हा आपण स्वयंपाकघरात जेवणात चव वाढवण्यासाठी हिरव्या मिरच्या वापरतो, तेव्हा त्यामागे एक लपलेली वेदनादायक गोष्ट असते, मिरच्या कापल्यावर हातांना होणारी तीव्र जळजळ! अनेकदा ही जळजळ इतकी असह्य होते की तुम्ही कितीही वेळा हात धुतले, तरीही आराम मिळत नाही. पण ही सामान्य समस्या असून, काही सोपे घरगुती उपाय वापरल्यास तुम्हाला काही मिनिटांत आराम मिळू शकतो.
हिरव्या मिरच्यांमुळे हात का जळतात, हे समजून घेणे महत्त्वाचे आहे. मिरच्यांमध्ये कॅप्सेसिन नावाचे एक रसायन असते, जे ज्या प्रमाणात जास्त, तितकी जळजळ अधिक तीव्र. हे रसायन तुमच्या त्वचेशी संपर्कात आले की तीव्र जळजळ सुरू होते. मात्र, ही कुठलीही गंभीर समस्या नाही. खाली दिलेले घरगुती उपाय तुम्हाला त्वरित आराम देतील.
थंड दूध किंवा दही
जर तुमचे हात मिरच्या कापल्यावर अक्षरशः पेटायला लागले असतील, तर लगेच थंड दूध किंवा दही हातांवर लावा. या नैसर्गिक थंड वस्तूंमुळे त्वचेला शीतलता मिळते आणि कॅप्सेसिनचा परिणाम कमी होतो. तसंच, गावरान तूप लावल्यानेही फारसा फरक पडतो. ही पद्धत फार पूर्वीच्या काळापासून वापरली जाते.
कोरफड
कोरफड म्हणजेच अ‍ॅलोवेराचा जेलदेखील तुमच्यासाठी वरदान ठरू शकतो. हे जेल हातांवर क्रीमसारखं लावा आणि काही वेळ त्याला मुरू द्या. त्यातील थंड गुणधर्मामुळे त्वचेला शांतता मिळते.
मध
ज्याप्रमाणे मध तुमच्या घशाला आराम देतो, त्याचप्रमाणे तो जळजळलेल्या त्वचेसाठीही उपयुक्त ठरतो. थोडासा मध घ्या, त्यात लिंबाचा रस आणि थोडं पाणी मिसळा आणि ते मिश्रण हातांवर लावा. मध थोडा चिकट असतो पण त्याचे थंड गुणधर्म त्वचेला दिलासा देतात.
बर्फ
शेवटी, एक सोपा आणि झटपट उपाय म्हणजे बर्फ. बर्फाचा तुकडा घ्या आणि हातांवर घासून मालिश करा. नंतर हात थंड पाण्यात काही वेळ भिजवा. ही पद्धत कॅप्सेसिनचा प्रभाव कमी करून त्वचेला तात्काळ आराम देते.
